അരിന്പൂർ: തൃശൂർ താലൂക്കിൽ ആദ്യമായി ലൈഫ് പദ്ധതി പ്രകാരം നിർമാണം പൂർത്തീകരിച്ച രണ്ട് ഭവനങ്ങളുടെ താക്കോൽ ദാനം അരിന്പൂർ സെന്ററിൽ ഇന്നലെ ഉച്ചയ്ക്ക്മുരളി പെരുന്നെല്ലി എംഎൽഎ നിർവഹിച്ചു.
പൊന്മാണി വീട്ടിൽ ജോളി ജോസഫ്, മാജൻ വീട്ടിൽ തങ്കമ്മ ജോസ് എന്നിവരുടെ വീടുകളാണ് പൂർണമായും നിർമാണം പൂർത്തീകരിച്ചത്. സർക്കാർ നല്കിയ 3,60,000 രൂപ ഉയോഗിച്ചാണ് 450 സ്ക്വയർ ഫീറ്റിൽ ഇരുവരും വീടുകൾ നിർമിച്ചത്.
പഞ്ചായത്തിൽ 45 കുടുംബങ്ങളാണ് പദ്ധതിയിൽ അർഹത നേടിയത്. അതേസമയം കോണ്ഗ്രസിലെ ജനപ്രതിനിധികളും കോണ്ഗ്രസ് മണ്ഡലം കമ്മിറ്റിയും താക്കോൽദാനച്ചടങ്ങ് ബഹിഷ്കരിച്ചു. അർഹതപ്പെട്ട എല്ലാവർക്കും വീട് നൽകാതെ മാനദണ്ഡങ്ങൾ പാലിക്കാതെ അർഹതയുള്ള പാവപ്പെട്ടവരെ ലിസ്റ്റിൽ നിന്ന് ഒഴിവാക്കിയെന്ന് കോണ്ഗ്രസ് മണ്ഡലം കമ്മിറ്റി ആരോപിച്ചു.
താക്കോൽദാന സമ്മേളനത്തിൽ ഗ്രാമപഞ്ചായത്ത് പ്രസിഡന്റ് സുജാത മോഹൻ ദാസ് അധ്യക്ഷയായിരുന്നു. ത്രിതല പഞ്ചായത്ത് അംഗങ്ങളായ കെ.എൽ. ജോസ്, ഷീബ മനോഹരൻ, എൻ. സതീഷ്, സിന്ധു സഹദേവൻ, ശോഭ ഷാജി, സി.ജി. മോഹൻദാസ്, ഓമന അശോകൻ, ജയശ്രീ രവി, ശാരദ ഗിരിജ, ടി.ആർ. അരവിന്ദാക്ഷൻ, സി.പി. പോൾ, കെ. പ്രസീദ് വിവിധ രാഷ്ട്രീയ കക്ഷി നേതാക്കളായ കെ. ആർ. ബാബുരാജ്, ലാസർ പരയ്ക്കാട്, മാർട്ടിൻ ചാലിശേരി എന്നിവർ പ്രസംഗിച്ചു.
ലൈഫ് പദ്ധതി ജില്ലാ കോ ഓർഡിനേറ്റർ ലിൻസ് ഡേവിഡ് പദ്ധതി വിശദീകരിച്ചു. പദ്ധതി ലക്ഷ്യത്തിലെത്തിക്കുന്നതിന് പ്രയത്നിച്ച വിഇഒ പി.പി. ജ്യോതിയെ അനുമോദിച്ചു. പഞ്ചായത്ത് വൈസ് പ്രസിഡന്റ് എൻ.സി. സതീഷ് സ്വാഗതവും അസി.സെക്രട്ടറി എ. എൽ. തോമസ് നന്ദിയും പറഞ്ഞു.
താക്കോൽദാന ചടങ്ങ് ബഹിഷ്കരിച്ച് കോണ്ഗ്രസ്
12:25 AM Nov 06, 2018 | Deepika.com