കൊരട്ടി: കൊരട്ടി ദേശീയപാത ജെടിഎസ് ജംഗ്ഷനിൽ ബൈക്കും സ്കൂൾ ബസും കൂട്ടിയിടിച്ച് ബൈക്കിൽ യാത്ര ചെയ്ത യുവാവ് മരിച്ചു. നെല്ലിക്കുന്ന് ചങ്കൻ വീട്ടിൽ ഹെറിൻ ജോയ് (24) ആണ് മരിച്ചത്. ഇന്നലെ വൈകീട്ട് അഞ്ചിനാണ് സംഭവം.
കൊരട്ടി പോളിടെക്നിക് പരിസരങ്ങളിൽ കുട്ടികളെ ഇറക്കി ജെടിഎസ് ജംഗ്ഷനിലെത്തിയ സ്കൂൾബസ് കൊരട്ടി ഭാഗത്തേക്ക് യുടേണ് എടുക്കുന്നതിനിടെ അങ്കമാലി ഭാഗത്ത് നിന്ന് വരികയായിരുന്ന ഹെറിൻ ഓടിച്ച ബൈക്ക് ഇടിക്കുകയായിരുന്നുവത്രേ. ഇടിയെ തുടർന്ന് തൊട്ടടുത്ത ബസ് സ്റ്റോപ്പിലേക്ക് തെറിച്ച് വീണ ഹെറിനെ ഉടൻ ചാലക്കുടി സെന്റ് ജെയിംസ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
വാഹനാപകടം നിത്യസംഭവമായി മാറിയ കൊരട്ടി ദേശീയപാതയിൽ കഴിഞ്ഞയാഴ്ച പൊങ്ങം ഐഒസിഎൽ പന്പിന് സമീപമുണ്ടായ വാഹനാപകടത്തിൽ ഒരു വീട്ടമ്മയും മരിച്ചിരുന്നു.
ബൈക്കും സ്കൂൾ ബസും കൂട്ടിയിടിച്ച് ബൈക്ക് യാത്രികൻ മരിച്ചു
11:16 PM Nov 05, 2018 | Deepika.com