തൃശൂർ: ഒളരിക്കര ലിറ്റിൽ ഫ്ലവർ പള്ളിയിലെ വിശുദ്ധ കൊച്ചുത്രേസ്യയുടെയും വിശുദ്ധ സെബസ്ത്യാനോസിന്റെയും തിരുനാൾ കൊടിയേറ്റം വികാരി ഫാ. ഷാജു ഉൗക്കൻ നിർവഹിച്ചു. 11നാണ് തിരുനാൾ. എട്ടാം തീയതി പ്രസുദേന്തിവാഴ്ച അതിരൂപത സഹായമെത്രാൻ മാർ ടോണി നീലങ്കാവിൽ നിർവഹിക്കും. ഒന്പതിനു വൈകീട്ട് 5.30നു ദിവ്യബലിക്കുശേഷം ദീപാലങ്കാരം സ്വിച്ച് ഓണ് അസിസ്റ്റന്റ് കമ്മീഷണർ വി.കെ. രാജു നിർവഹിക്കും.
തുടർന്നു പുണ്യവതിയുടെ കിരീടം എഴുന്നള്ളിപ്പ് നടക്കും. പത്തിനു വൈകീട്ട് 4.30ന് ദിവ്യബലി, കൂടുതുറക്കൽ, അന്പ് തിരുശേഷിപ്പ് എഴുന്നള്ളിപ്പ് എന്നിവയും രാത്രി 11ന് ഫാ. ബാബു ചേലപ്പാടന്റെ സ്മരണാർഥമുള്ള ബാൻഡ് മത്സരവും നടക്കും.
തിരുനാൾദിവസമായ 11നു രാവിലെ ആറിനും ഏഴിനും എട്ടിനും ദിവ്യബലി, പത്തിന് ആഘോഷമായ പാട്ടുകുർബാന, വൈകീട്ട് നാലിനു ദിവ്യബലിക്കു ശേഷം തിരുനാൾ പ്രദക്ഷിണം എന്നിവ നടക്കും. തിരുനാളിനോടനുബന്ധിച്ച് ചികിത്സാ ധനസഹായവിതരണം സംഘടിപ്പിക്കുമെന്നു വികാരി ഫാ. ഷാജു ഉൗക്കൻ അറിയിച്ചു. ഇന്നുമുതൽ വൈകീട്ട് നവനാൾ കുർബാന, ലദീഞ്ഞ്, നൊവേന എന്നിവ
ഉണ്ടായിരിക്കും.
ഒളരിക്കര തിരുനാളിനു കൊടിയേറി
12:54 AM Nov 03, 2018 | Deepika.com