പത്തനംതിട്ട: ജില്ലയില് കഴിഞ്ഞ മാസം എക്സൈസ് വകുപ്പ് പിടിച്ചെടുത്തത് 2.47 കിലോഗ്രാം കഞ്ചാവും 1109 കിലോഗ്രാം നിരോധിത പുകയില ഉത്പന്നങ്ങളുമാണെന്ന് വ്യാജമദ്യനിയന്ത്രണ സമിതി യോഗത്തില് എക്സൈസ് വകുപ്പ് അറിയിച്ചു. ജില്ലയില് എക്സൈസ് വകുപ്പ് ഒരു മാസം ഇത്രയധികം മയക്കുമരുന്നും നിരോധിത പുകയില ഉത്പന്നങ്ങളം കണ്ടെടുത്തിയിട്ടുള്ളത് ഇതാദ്യമാണ്.
സ്കൂളുകളും കോളജുകളും കേന്ദ്രീകരിച്ച് കഞ്ചാവ് ഉള്പ്പെടെയുള്ള ലഹരിമരുന്നുകളുടെ വിതരണം വ്യാപകമായി നടക്കുന്നതായി നേരത്തേ എക്സൈസ് വകുപ്പ് മുന്നറിയിപ്പ് നല്കിയിരുന്നു. ഇതിന്റെ അടിസ്ഥാനത്തില് കര്ശനമായ പരിശോധനകള് നടക്കുന്നുണ്ട്. കഴിഞ്ഞ ഒരു മാസത്തിനുള്ളില് ജില്ലയില് എക്സൈസ് 941 റെയ്ഡുകള് നടത്തി. 139 അബ്കാരി കേസുകളിലായി 119 പേരെ പ്രതി ചേര്ക്കുകയും 114 പേരെ അറസ്റ്റ് ചെയ്യുകയും ചെയ്തു.
മയക്കുമരുന്ന് വിതരണവുമായി ബന്ധപ്പെട്ട് രഹസ്യ വിവര ശേഖരണത്തിലൂടെ പ്രത്യേക റെയ്ഡുകള് നടത്തുന്നുണ്ട്. അനധികൃത വിദേശമദ്യ വില്പനക്കാര്ക്കെതിരെ ജാമ്യമില്ല വകുപ്പുകള് ചുമത്തി കേസുകള് എടുത്തിട്ടുണ്ട്.
915 കോട്പ കേസുകള് രജിസ്റ്റര് ചെയ്ത് 1,88,100 രൂപ പിഴ സര്ക്കാരിലേയ്ക്ക് ഈടാക്കി.
ജില്ലയിലെ വനമേഖലകളിലും പരിശോധന ശക്തിപ്പെടുത്തിയിട്ടുണ്ട്. ശബരിമല തീര്ഥാടനത്തോടനുബന്ധിച്ച് നിലയ്ക്കല്, പമ്പ, സന്നിധാനം എന്നിവിടങ്ങളില് താത്കാലിക റേഞ്ചുകള് ആരംഭിക്കും.
പമ്പ, മണ്ണാറക്കുളഞ്ഞി എന്നിവിടങ്ങളില് രണ്ട് പട്രോളിംഗ് ടീമുകള് സജ്ജീകരിക്കും.കായികമത്സരങ്ങളിലൂടെ ലഹരി വിരുദ്ധസന്ദേശം യുവജനങ്ങള്ക്കിടയില് എത്തിക്കുന്നതിനായി എക്സൈസ് വകുപ്പ് റേഞ്ച്, സര്ക്കിള് തലത്തില് സംഘടിപ്പിച്ച ഫുട്ബോള് മത്സര വിജയികളെ ഉള്പ്പെടുത്തിയുള്ള ജില്ലാതല മത്സരം 10ന് നടക്കും.
എഡിഎം പി.ടി. ഏബ്രഹാം അധ്യക്ഷത വഹിച്ച അവലോകന യോഗത്തില് കോന്നി ബ്ലോക്ക് പഞ്ചായത്ത് പ്രസിഡന്റ് കോന്നിയൂര് പി.കെ, പന്തളം ബ്ലോക്ക് പഞ്ചായത്ത് പ്രസിഡന്റ് പി.കെ തങ്കമ്മ ടീച്ചര്, കേരള മദ്യനിരോധന സമിതി ജില്ലാ പ്രസിഡന്റ് വാളകം ജോണ്, ഡിഎംഒ ടെക്നിക്കല് അസിസ്റ്റന്റ് എം.ആര് അനില്കുമാര്, ഹ്യൂമന് റൈറ്റ്സ് പ്രെമോഷന് കൗണ്സില് ജില്ലാ പ്രതിനിധി രാജമ്മ സദാനന്ദന്, റാന്നി ഫോറസ്റ്റ് ഡിവിഷന് റേഞ്ച് ഫോറസ്റ്റ് ഓഫീസര് തോമസ് ജോണ്, മദ്യവർജന ബോധവത്കരണ സമിതി സംസ്ഥാന ജനറല് സെക്രട്ടറി ബേബിക്കുട്ടി ദാനിയേല്, മദ്യവര്ജനസമിതി വൈസ്പ്രസിഡന്റ് പി.വി ഏബ്രഹാം, കേരള മദ്യവര്ജന ബോധവത്കരണ സമിതി പ്രസിഡന്റ് സോമന് പാമ്പായിക്കോട്, ഐഎന്ടിയുസി ജില്ലാ ജനറല് സെക്രട്ടറി പി.കെ ഗോപി, കേരള മദ്യനിരോധനസംഘം ജില്ലാ പ്രസിഡന്റ് ജയചന്ദ്രന് ഉണ്ണിത്താന്, ഡിഇഒ പത്തനംതിട്ട ജി. ഉഷ, മദ്യവര്ജന സമിതി ജില്ലാ സെക്രട്ടറി എം.അബ്ദുള്കലാം, ബിഎംഎസ് പ്രതിനിധികളായ പി.എസ് ശശി, വി. രാജന്പിള്ള, എക്സൈസ് ഡിവിഷന് ഓഫീസ് മാനേജര് പി.കെ. ഹരികുമാര്, സിവില് എക്സൈസ് ഓഫീസര് ബൈജു ലാല്, പ്രിവന്റീവ് ഓഫീസര് ഷെമീര്, തുടങ്ങിയവര് പങ്കെടുത്തു.
ജില്ലയിൽ ഒരുമാസത്തിനിടെ പിടികൂടിയത് 2.47 കിലോഗ്രം കഞ്ചാവും 1109 കിലോഗ്രാം നിരോധിത പുകയില ഉത്പന്നങ്ങളും
10:28 PM Oct 31, 2018 | Deepika.com