കാടുകുറ്റി: കാടുകുറ്റി ഗ്രാമപഞ്ചായത്തിലെ പ്രളയ ദുരിതാശ്വാസ പ്രവർത്തനങ്ങളെ സിപിഎം അട്ടിമറിക്കുന്നുവെന്നാരോപിച്ച് കാടുകുറ്റി മണ്ഡലം കോണ്ഗ്രസ് കമ്മിറ്റിയുടെ നേതൃത്വത്തിൽ വാഹന പ്രചരണ ജാഥയും രാഷ്ട്രീയ വിശദീകരണയോഗവും നടത്തി.
വാഹന പ്രചരണജാഥ ചാലക്കുടി ബ്ലോക്ക് കോണ്ഗ്രസ് പ്രസിഡന്റ് എബി ജോർജ് ഉദ്ഘാടനം ചെയ്തു. കാടുകുറ്റി മണ്ഡലം കോണ്ഗ്രസ് പ്രസിഡന്റ് എം.ഡി വർഗീസ് അധ്യക്ഷനായി. സംസ്ഥാനത്തിനകത്തും പുറത്തും നിന്നുളള വിവിധ സന്നദ്ധസംഘടനകളിൽ നിന്നും വ്യക്തികളിൽ നിന്നും പ്രളയബാധിതർക്കായി പഞ്ചായത്ത് സ്വന്തം നിലയിൽ ശേഖരിച്ച അവശ്യവസ്തുക്കൾ വിതരണം ചെയ്യാൻ പഞ്ചായത്ത് കമ്മിറ്റി തീരുമാനമെടുത്തിരിക്കെ കിറ്റ് വിതരണത്തിലെ കാലതാമസവും ക്രമക്കേടും ആരോപിച്ച് ഡിവൈഎഫ്ഐ യുടെയും സിപിഎമ്മിന്റെയും നേതൃത്വത്തിൽ പഞ്ചായത്ത് കമ്മ്യൂണിറ്റി ഹാളിന്റെ ഗേറ്റ് പൂട്ട് തകർത്ത് കഴിഞ്ഞ 22ന് നടത്തിയ സമരം രാഷ്ട്രീയമുതലെടുപ്പ് ലക്ഷ്യമിട്ടായിരുന്നെന്ന് കോണ്ഗ്രസ് മണ്ഡലം കമ്മിറ്റി ആരോപിച്ചു.
പഞ്ചായത്തിന്റെ പൂർണ ചുമതല വഹിക്കുന്ന പഞ്ചായത്ത് സെക്രട്ടറിയെ ഓഫീസിൽ പൂട്ടിയിട്ടതും സ്ഥലത്തെത്തിയ തഹസിൽദാരുടെ ആവശ്യപ്രകാരം പഞ്ചായത്ത് വാഹനത്തിൽ കമ്മ്യൂണിറ്റി ഹാളിലേക്ക് വന്ന സെക്രട്ടറിയെ വാഹനത്തിൽ നിന്നും വലിച്ചിറക്കി കൂകി വിളിച്ച് തെരുവിലൂടെ നടത്തിയതും ഡിവൈഎഫ്ഐ-സിപിഎം സമരാഭാസങ്ങളുടെ മറ്റൊരു മുഖമാണെന്നും മണ്ഡലം കമ്മിറ്റി അഭിപ്രായപ്പെട്ടു.
കാടുകുറ്റി ഗ്രാമപഞ്ചായത്തിന്റെ 16 കേന്ദ്രങ്ങളിലേക്കാണ് വാഹന പ്രചരണ ജാഥ സംഘടിപ്പിച്ചത്. ഗ്രാമപഞ്ചായത്ത് പ്രസിഡന്റ് തോമസ് ഐ കണ്ണത്ത്, വൈസ് പ്രസിഡന്റ് മോളി തോമസ്, എം.ആർ. ഡേവീസ്, വി.എ പത്മനാഭൻ, രാധ ബാലകൃഷ്ണൻ, ടെഡി സിമേതി, ടി.പി. പോൾ, കെ.കൃഷ്ണൻകുട്ടി, ഡെന്നീസ് ഡിക്കോസ്റ്റ എന്നിവർ പ്രസംഗിച്ചു.
വൈകീട്ട് കാടുകുറ്റി ജംഗ്ഷനിൽ നടന്ന പ്രതിഷേധ പൊതുയോഗം യൂത്ത് കോണ്ഗ്രസ് സംസ്ഥാന സെക്രട്ടറി ഷോണ് പെല്ലിശേരി ഉദ്ഘാടനം ചെയ്തു. പ്രവാസി കോണ്ഗ്രസ് ജില്ലാ പ്രസിഡന്റ് ഷാഹൂൽ പണിക്കവീട്ടിൽ, മേഴ്സി ഫ്രാൻസീസ്, ലീന ഡേവീസ്, ബിജു കാതിക്കുടം തുടങ്ങിയവർ പ്രസംഗിച്ചു.
ദുരിതാശ്വാസ പ്രവർത്തനങ്ങളെ അട്ടിമറിക്കുന്നുവെന്നാരോപിച്ച് വാഹനപ്രചാരണ ജാഥയും വിശദീകരണയോഗവും
01:19 AM Oct 08, 2018 | Deepika.com