സ്ലാബ് തകർന്നു ബസ് കാനയിൽ കുടുങ്ങി
12:59 AM Apr 06, 2017 | Deepika.com
തൃശൂർ: എംജി റോഡിൽ കോട്ടപ്പുറത്തിനടുത്ത് സ്ലാബ് തകർന്ന് ബസ് കാനയിൽ പൂണ്ടു. ഇന്നലെ രാവിലെ ഏഴരയോടെയാണു സംഭവം. റോഡരികിലേക്കു നീക്കി പാർക്കു ചെയ്യുന്നതിനിടെ കാനയ്ക്കു മുകളിലെ സ്ലാബ് തകരുകയും ബസിന്റെ ചക്രങ്ങൾ കാനയിൽ കുടുങ്ങുകയുമായിരുന്നു. ക്രെയിൻ എത്തിയാണ് ബസിന്റെ ചക്രങ്ങൾ കാനയിൽനിന്നു വലിച്ചു പുറത്തെടുത്തത്. എറണാകുളത്തേക്കുള്ള യാത്രയ്ക്കായി യാത്രക്കാരെ കയറ്റാൻ നിർത്തിയതായിരുന്നു ബസ്. ഏതാനും ആഴ്ചകൾക്കുമുന്പ് ഒരു കാറും ഇവിടെ സ്ലാബ് തകർന്ന് കാനയിൽ കുടുങ്ങിയിരുന്നു. ഈ പ്രദേശത്തെ കാനകൾക്കു മുകളിൽ കോർപറേഷൻ വളരെ കനം കുറഞ്ഞ സ്ലാബുകളാണു സ്ഥാപിച്ചിരിക്കുന്നത്. റോഡിനോടു ചേർന്നുകിടക്കുന്ന കാനയ്ക്കു മുകളിൽ ഭാരവാഹനങ്ങൾ കയറിയാൽ തകരാത്ത സ്ലാബുകളാണു സ്ഥാപിക്കേണ്ടിയിരുന്നത്. എന്നാൽ ഫുട്പാത്തിൽ കാൽനടയാത്രക്കാർക്കു മാത്രം ഉപയോഗിക്കാവുന്ന സ്ലാബുകളേക്കാൾ കനംകുറഞ്ഞതും വേണ്ടത്ര കന്പികൾ ഉപയോഗിക്കാത്തതുമായ സ്ലാബുകളാണ് ഇവിടെ സ്ഥാപിച്ചിരിക്കുന്നത്. സ്ലാബുകൾ മാറ്റി കരുത്തുള്ളവ സ്ഥാപിച്ചില്ലെങ്കിൽ എംജി റോഡിൽ ഇത്തരം അപകടങ്ങൾ തുടർക്കഥയാകും.