റാന്നി: വൈക്കം ഗവൺമെന്റ് യുപി സ്കൂൾ പൂർണമായും ഡിജിറ്റലൈസ് ചെയ്യുന്നതിനുള്ള പദ്ധതിക്ക് തുടക്കംകുറിച്ചു.
ഇതിനായി തയാറാക്കിയ മൂന്നു കോടി രൂപയുടെ പദ്ധതിരേഖ രാജു ഏബ്രഹാം എംഎൽഎ കഴിഞ്ഞദിവസം നടന്ന ചടങ്ങിൽ പ്രകാശനം ചെയ്തു.
സ്കൂളിന്റെ ദ്വിശതാബ്ദി ആഘോഷവേളയിൽ പദ്ധതി പൂർത്തിയാക്കുന്നതിനാണ് ലക്ഷ്യമിടുന്നത്. സ്കൂളിനോടനുബന്ധിച്ച് എംഎൽഎ ഫണ്ടിൽ നിന്നും പണിയുന്ന കെട്ടിടത്തിന് 20 ലക്ഷം രൂപ കൂടി നല്കും. മേയ് മാസത്തോടെ കെട്ടിടം ഉദ്ഘാടനം നിർവഹിക്കുമെന്ന് രാജു ഏബ്രഹാം എംഎൽഎ അറിയിച്ചു.
സ്കൂൾ വാർഷികം രാജു ഏബ്രഹാം എംഎൽഎ ഉദ്ഘാടനം ചെയ്തു. സുമ വിജയകുമാറിന്റെ അധ്യക്ഷതയിൽ നടന്ന യോഗത്തിൽ പഞ്ചായത്തിൽ നിന്നും അനുവദിച്ചു നിർമിച്ച പാർക്കിന്റെ ഉദ്ഘാടനം പഞ്ചായത്ത് പ്രസിഡന്റ് ശശികല രാജശേഖരൻ നിർവഹിച്ചു. ധീരതയ്ക്കുള്ള അവാർഡ് നേടിയ അഖിൽ ഷിബു, ആദിത്യൻ എം. പി. പിള്ള, എംജി സർവകലാശാല റാങ്ക് ജേതാവ് റോബീന ആൻസ് ജോസഫ് എന്നിവരെ ജില്ലാ പഞ്ചായത്തംഗം സൂസൻ അലക്സ് ആദരിച്ചു.
പി.ആർ. പ്രസാദ് എൻഡോവ്മെന്റ് വിതരണവും സുമ വിജയകുമാർ സമ്മാനദാനവും നിർവഹിച്ചു. പി.കെ. ബിനു, ടി.എൻ. ശിവൻകുട്ടി, ആൻസി ജോൺ, സാബു കണ്ണൻ കുഴയത്ത്, അൻസാരി മന്ദിരം, പി. ബാബു, കെ.ബി. പ്രസന്നകുമാരി, അലൻ സാം ബിനു എന്നിവർ പ്രസംഗിച്ചു.
വൈക്കം ഗവൺമെന്റ് യുപിഎസ് ഡിജിറ്റലൈസ് ചെയ്യാൻ പദ്ധതി
10:53 PM Mar 22, 2017 | Deepika.com