പത്തനംതിട്ട: സംസ്ഥാന സര്ക്കാര് നടപ്പാക്കുന്ന കെ-ഫോണ് പദ്ധതിയുടെ ഉദ്ഘാടനവുമായി ബന്ധപ്പെട്ടു നാളെ പത്തനംതിട്ട ജില്ലയിലെ എല്ലാ നിയോജക മണ്ഡലങ്ങളിലും പരിപാടികള് സംഘടിപ്പിക്കും.
വൈകുന്നേരം നാലിന് ഓമല്ലൂര് ഗവ. എച്ച്എസ്എസില് ആറന്മുള മണ്ഡലം തല പരിപാടിയില് മന്ത്രി വീണാ ജോര്ജും മൂന്നിനു മൂന്നാളം ഗവ. ലോവര് പ്രൈമറി സ്കൂളില് അടൂര് മണ്ഡലതല പരിപാടിയില് ഡെപ്യൂട്ടി സ്പീക്കര് ചിറ്റയം ഗോപകുമാറും മൂന്നിന് കുറ്റൂര് ഗവ. എച്ച്എസ്എസില് തിരുവല്ല മണ്ഡലതല പരിപാടിയില് മാത്യു ടി. തോമസ് എംഎല്എയും പങ്കെടുക്കും.
നാലിന് കുമ്പളാംപൊയ്ക സിഎംഎസ് ഹൈസ്കൂളില് റാന്നി മണ്ഡലതല പരിപാടിയില് പ്രമോദ് നാരായണ് എംഎല്എയും മൂന്നിനു കൈപ്പട്ടൂര് ഗവ. വിഎച്ച്എസ്എസില് കോന്നി മണ്ഡലതല പരിപാടിയില് കെ.യു. ജനീഷ് കുമാര് എംഎല്എയും പങ്കെടുക്കും. സംസ്ഥാനതല ഉദ്ഘാടന പരിപാടി എല്ലാ വേദികളിലും തത്സമയം എല്ഇഡി വാളില് പ്രദര്ശിപ്പിക്കും. കളക്ടറേറ്റിലും ഉദ്ഘാടന പരിപാടി തത്സമയം പ്രദര്ശിപ്പിക്കും.
500 വീട്, 1,331 സ്ഥാപനങ്ങൾ
പത്തനംതിട്ട ജില്ലയില് കെ-ഫോണിനായി 956 കിലോമീറ്റര് ദൂരത്തിലാണ് ഇതുവരെ കേബിള് സ്ഥാപിച്ചിട്ടുള്ളത്. ദാരിദ്ര്യരേഖയ്ക്കു താഴെയുള്ളവരുടെ 500 ഭവനങ്ങളിലും സര്ക്കാര് ഓഫീസുകളും സ്കൂളുകളും ഉള്പ്പെടെ 1,331 സ്ഥാപനങ്ങളിലും ഇതിനകം കെ-ഫോണ് കണക്ഷന് നല്കിക്കഴിഞ്ഞു.
പത്തനംതിട്ട അഴൂര് കെഎസ്ഇബി സബ് സ്റ്റേഷനോടനുബന്ധിച്ചു സ്ഥാപിച്ചിട്ടുള്ള 24 മണിക്കൂറും പ്രവര്ത്തിക്കുന്ന കോര് പിഒപിയില് സ്ഥാപിച്ചിട്ടുള്ള കേന്ദ്രീകൃത സംവിധാനത്തില്നിന്നാണ് ജില്ലയിലെ കെ-ഫോണ് സംവിധാനത്തിന്റെ നിയന്ത്രണം. ഇതുകൂടാതെ ജില്ലയില് വിവിധ സ്ഥലങ്ങളിലായി സ്ഥാപിച്ചിട്ടുള്ള 15 പിഒപികളും തടസരഹിതമായ ഇന്റര്നെറ്റ് സേവനം ഉറപ്പാക്കുമെന്ന് അധികൃതർ പറഞ്ഞു.
പത്തനംതിട്ട ഒരുപടി മുന്നില്
2023 മാര്ച്ച് അവസാനം മുതല് പത്തനംതിട്ട ജില്ലാ കളക്ടറേറ്റിലെ പ്രവര്ത്തനങ്ങള് കെ-ഫോണിലാണ് നടന്നുവരുന്നത്. ജില്ലയിലെ വിവിധ സര്ക്കാര് ഓഫീസുകളില്നിന്നു ജില്ലാ കളക്ടറേറ്റിലേക്കും അവിടെനിന്നു സംസ്ഥാന ഡാറ്റാ സെന്ററിലേക്കുമാണ് ഔദ്യോഗിക ഉപയോഗത്തിലുള്ള വിവിധ പോര്ട്ടലുകളിലെ ഡാറ്റാ കൈമാറ്റം കെ-ഫോണ് മുഖേന സുഗമമായി നടന്നുവരികയാണ്.
മാര്ച്ച് മുതല് പത്തനംതിട്ട ജില്ലാ കളക്ടറേറ്റും സ്റ്റേറ്റ് ഡാറ്റാ സെന്ററും തമ്മിലുള്ള ഡാറ്റാ കൈമാറ്റം പൂര്ണമായും കെ-ഫോണ് നെറ്റ്വര്ക്ക് മുഖേന ആക്കിയിട്ടുണ്ട്.
സംസ്ഥാനത്ത് 2,519 കിലോമീറ്റര് ഒപിജിഡബ്ല്യു കേബിളിംഗും 19,118 കിലോമീറ്റര് എഡിഎസ്എസ് കേബിളിംഗും പൂര്ത്തിയാക്കി. കൊച്ചി ഇന്ഫോപാര്ക്ക് കേന്ദ്രീകരിച്ചാണ് കെ-ഫോണിന്റെ സംസ്ഥാനതല ഓപ്പറേറ്റിംഗ് സെന്റര് പ്രവര്ത്തിക്കുന്നത്. പദ്ധതിക്ക് അടിസ്ഥാന സൗകര്യ സേവനങ്ങള് നല്കുന്നതിനാവശ്യമായ കാറ്റഗറി 1 ലൈസന്സും ഔദ്യോഗികമായി ഇന്റര്നെറ്റ് സേവനങ്ങള് നല്കാനുള്ള ഇന്റര്നെറ്റ് സര്വീസ് പ്രൊവൈഡര് (ഐഎസ്പി) കാറ്റഗറി ബി യൂണിഫൈഡ് ലൈസന്സും നേരത്തെ ലഭ്യമായിരുന്നു.
കെ-ഫോണ് ഉദ്ഘാടനം നാളെ; ജില്ലയിൽ വിപുല പരിപാടികള്
06:38 AM Jun 04, 2023 | Deepika.com