കരുവാരകുണ്ട്: കരുവാരക്കുണ്ട് ഗ്രാമപഞ്ചായത്തിലെ പുതിയ ടൂറിസം സാധ്യതകളെക്കുറിച്ച് ചർച്ച ചെയ്യുന്നതിനായി യോഗം ചേർന്നു. ഗ്രാമപഞ്ചായത്ത് പ്രസിഡന്റ് വി.എസ്.പൊന്നമ്മയുടെ അധ്യക്ഷതയിൽ ചേർന്ന യോഗത്തിൽ ഡിടിപിസി സെക്രട്ടറി വിപിൻ ചന്ദ്ര ഉൾപ്പെടെയുള്ള ഉദ്യോഗസ്ഥർ പങ്കെടുത്തു. കരുവാരക്കുണ്ടിന്റെ സൗന്ദര്യത്തിന് കളങ്കം സംഭവിക്കാത്ത തരത്തിൽ ടൂറിസം സാധ്യതകൾ വളർത്തിയെടുക്കാനുള്ള ഒരുക്കത്തിലാണ് ഗ്രാമപഞ്ചായത്ത്.
ഇതിന്റെ ഭാഗമായാണ് ഡിടിപിസി സംഘം ടൂറിസം കേന്ദ്രങ്ങളാക്കാൻ സാധ്യതയുള്ള പ്രദേശങ്ങളിൽ സന്ദർശനം നടത്തുകയും ഭരണ സമിതി അംഗങ്ങളുമായി ചർച്ച നടത്തുകയും ചെയ്തത്. കൽക്കുണ്ട്, കേരളാംകുണ്ട് ഭാഗങ്ങളിൽ ഇതിനനുയോജ്യമായ സ്ഥലം കണ്ടെത്തിയിട്ടുണ്ട്. ഇതു സംബന്ധിച്ച് പഠനം നടത്തിയ ശേഷമാകും തുടർപ്രവർത്തനങ്ങൾ ഉണ്ടാവുക. പദ്ധതി യാഥാർഥ്യമാക്കുന്നതിനായി സ്ഥലം വിട്ടു നൽകാൻ തയാറുള്ളവരെ കൂടി പങ്കെടുപ്പിച്ച് സർവകക്ഷി യോഗം ചേരാനും തീരുമാനിച്ചു. യോഗത്തിൽ ഡിടിപിസി ഡെപ്യൂട്ടി ഡയറക്ടർ പത്മകുമാർ, ഗ്രാമപഞ്ചായത്ത് സ്ഥിരം സമിതി അധ്യക്ഷരായ ടി.കെ.ഉമ്മർ, ഷീബ പള്ളിക്കുത്ത്, ഷീന ജിൽസ്, സെക്രട്ടറി കെ.ഷാനിർ, ആസൂത്രണ സമിതി ഉപാധ്യക്ഷൻ കെ.കെ.ജയിംസ്, എൻ.ടി.കബീർ, പി.മുഹമ്മദാലി, വി.സി.ഉണ്ണികൃഷ്ണൻ, ഐ.ടി. സാജിത തുടങ്ങിയവർ പ്രസംഗിച്ചു.
കരുവാരകുണ്ടിൽ പുതിയ ടൂറിസം പദ്ധതികൾക്കു സാധ്യത തേടി
11:42 PM Dec 06, 2022 | Deepika.com