പത്തനംതിട്ട: മയക്കുമരുന്നിനെതിരേ ജനകീയ പ്രതിരോധമുയര്ത്താനുള്ള സര്ക്കാരിന്റെ വിപുലമായ പ്രചാരണ പരിപാടികള്ക്ക് ഇന്നു തുടക്കമാകും. കേരളപ്പിറവി ദിനം വരെയാണ് ആദ്യഘട്ട പ്രചാരണം.
സംസ്ഥാനത്തെ പ്രഫഷണല് കോളേജ് അടക്കമുള്ള എല്ലാ വിദ്യാഭ്യാസ സ്ഥാപനങ്ങളിലും വാര്ഡുകളിലെ പ്രധാന കേന്ദ്രങ്ങളിലും ഗ്രന്ഥശാലകളിലും വിപുലമായ പരിപാടികളോടെ ഉദ്ഘാടന ചടങ്ങ് നടക്കും.
രാവിലെ 9.30നാണ് പരിപാടി തുടങ്ങുക. 10നു സംസ്ഥാനത്തെ എല്ലാ കേന്ദ്രങ്ങളിലെയും പരിപാടി മുഖ്യമന്ത്രി പിണറായി വിജയൻ ഓൺലൈനായി ഉദ്ഘാടനംചെയ്യും. കൈറ്റ് വിക്ടേഴ്സ് ചാനല് വഴിയാണ് മുഖ്യമന്ത്രിയുടെ പ്രസംഗം തത്സമയം സംപ്രേഷണം ചെയ്യുന്നത്. പ്രസംഗം പ്രദര്ശിപ്പിക്കാനുള്ള സംവിധാനം ഓരോ കേന്ദ്രത്തിലും ഒരുക്കിയിട്ടുണ്ട്.
മുൻ ഇന്ത്യൻ ക്രിക്കറ്റ് ടീം ക്യാപ്റ്റനും ബിസിസിഐ അധ്യക്ഷനുമായ സൗരവ് ഗാംഗുലിയാണ് പ്രചാരണത്തിന്റെ ബ്രാൻഡ് അംബാസഡര്. ലഹരിക്കെതിരേയുള്ള പരിപാടികളുടെ ഭാഗമായി സംസ്ഥാനതലം മുതല് വാര്ഡ് തലം വരെയും സ്കൂള് തലം വരെയും ജനകീയ സമിതികള് രൂപീകരിച്ചിട്ടുണ്ട്.
തുടര് പരിപാടികള്
ലഹരി വിരുദ്ധ കാന്പെയിന്റെ ഭാഗമായി നാളെ കുട്ടികളുടെ ക്ലാസ് റൂം ഡിബേറ്റുകളും നടക്കും.
എല്ലാ വിദ്യാലയങ്ങളിലും കോളജുകളിലും ഓരോ ക്ലാസ്റൂമിലും മയക്കുമരുന്നിനെ സംബന്ധിച്ചു ചര്ച്ചയും സംവാദവും സംഘടിപ്പിക്കും. വിദ്യാര്ഥികളുടെ ചര്ച്ചയും അധ്യാപകന്റെ ക്രോഡീകരണവും നടക്കും.
ഇന്നും നാളെയും എല്ലാ വിദ്യാഭ്യാസ സ്ഥാപനങ്ങളിലും പിടിഎ, എംപിടിഎ, വികസനസമിതി നേതൃത്വത്തില് രക്ഷിതാക്കള്ക്കുള്ള ബോധവത്കരണ പരിപാടിയും സംഘടിപ്പിക്കും.
നവംബര് ഒന്നിനു നടക്കുന്ന മനുഷ്യശൃംഖലയുടെ ആസൂത്രണവും ഈ യോഗത്തില് നടക്കും.
സംവാദവും പ്രതിജ്ഞയും
എട്ടു മുതല് 12 വരെ ക്ലബുകള്, ഹോസ്റ്റലുകള്, റസിഡന്ഷല് അസോസിയേഷനുകള് എന്നിവയുടെ നേതൃത്വത്തില് മയക്കുമരുന്ന് വിഷയത്തില് സംവാദവും പ്രതിജ്ഞയെടുക്കലും സംഘടിപ്പിക്കും. വിവിധ മേഖലകളിലുള്ള പ്രമുഖരുടെ സാന്നിധ്യം ഉറപ്പാക്കും. മുഖ്യമന്ത്രിയുടെ പ്രസംഗത്തിന്റെ വീഡിയോ പരിപാടികളില് പ്രദര്ശിപ്പിക്കും.
ഒന്പതിനു കുടുംബശ്രീയുടെ നേതൃത്വത്തില് സംസ്ഥാനത്തെ എല്ലാ അയല്ക്കൂട്ടങ്ങളും ലഹരിവിരുദ്ധ സഭ സംഘടിപ്പിക്കും. പട്ടികജാതി-പട്ടികവര്ഗ വകുപ്പിന്റെ നേതൃത്വത്തില് നടക്കുന്ന സാമൂഹ്യ ഐക്യദാര്ഢ്യ പക്ഷാചരണത്തിലും ലഹരി വിരുദ്ധ പ്രചാരണം ഉള്പ്പെടുത്തും.
14ന് ബസ് സ്റ്റാൻഡുകള്, ചന്തകള്, ടൗണുകള്, റെയില്വേ സ്റ്റേഷനുകള് എന്നിവിടങ്ങളില് വ്യാപാരികളുടെയും വ്യവസായികളുടെയും നേതൃത്വത്തില് ലഹരിവിരുദ്ധ സദസ് സംഘടിപ്പിക്കും. 16ന് വൈകുന്നേരം നാലു മുതല് ഏഴുവരെ എല്ലാ വാര്ഡുകളിലും ജനജാഗ്രതാ സദസ് ക്രമീകരിക്കും.
ലഹരിക്കെതിരേ മുന്നേറ്റം; കാന്പയിന് ഇന്നു തുടക്കം
10:59 PM Oct 06, 2022 | Deepika.com