ഹൂസ്റ്റണ്: ഹൂസ്റ്റണ് ട്രിനിറ്റി മാർത്തോമാ ഇടവകയുടെ പുതിയ വികാരിയായി ചുമതലയേൽക്കുവാൻ കേരളത്തിൽ നിന്നും എത്തിച്ചേർന്ന റവ. ജേക്കബ്. പി. തോമസിനും കുടുംബത്തിനും ജോർജ് ബുഷ് ഇ ന്റർകോണ്ടിനെന്റൽ വിമാനത്താവളത്തിൽ ഉൗഷ്മളമായ സ്വീകരണം നൽകി. അസി.വികാരി റവ. ഫിലിപ്പ് ഫിലിപ്പിന്റെ നേതൃത്വത്തിൽ ഇടവക ചുമതലക്കാർ സ്വീകരണത്തിന് നേതൃത്വം നൽകി.
ഓതറ മംഗലം സെന്റ് തോമസ് ഇടവകാംഗവും പരുത്തിമുട്ടത്ത് കുടുംബാംഗവുമായ അച്ചൻ കലഹണ്ഡി മിഷൻ ഫീൽഡ് മിഷനറി, ഫരീദബാദ് ധർമജ്യോതി വിദ്യാപീഡ് അധ്യാപകൻ, അയിരൂർ കാർമ്മൽ മാർത്തോമാ ഇടവക വികാരി എന്നീ നിലകളിൽ ശുശ്രൂഷ ചെയ്ത അനുഭവ സന്പത്തുമായാണ് ഹൂസ്റ്റണിൽ എത്തിയിരിക്കുന്നത്. ചെന്നൈ ഗുരുകുൽ തെയോളോജിക്കൽ കോളേജിൽ നിന്നും എംടിഎച് (ങഠവ) ബിരുദ പഠനത്തിനുശേഷം കോട്ടയം വൈദിക സെമിനാരിയിൽ ഡോക്ടറൽ പഠനവും നടത്തി വരുന്പോഴാണ് ഹൂസ്റ്റണിൽ വികാരിയായത്.
അച്ചന്റെ സഹധർമ്മിണി റിൻസി ജോണ് കൊട്ടാരക്കര വാളകം സ്വദേശിയും കിഴക്കേവിള കുടുംബാംഗവുമാണ്. മക്കളായ ഹർഷ സൂസൻ ജേക്കബും ഹന്നാ മറിയം ജേക്കബും സ്കൂൾ വിദ്യാർത്ഥികളാണ്.
നാനൂറിനടുത്തു കുടുംബങ്ങളുള്ള ട്രിനിറ്റി ഇടവകയുടെ പ്രവർത്തനങ്ങൾ സജീവമാക്കു ന്നതിനു അച്ചന്റെ അനുഭവസന്പത്തു ഒരു മുതൽകൂട്ടായി മാറുമെന്ന് ഇടവക ഭാരവാഹികൾ പ്രത്യാശ പ്രകടിപ്പിച്ചു. ട്രിനിറ്റി ഇടവകയുടെ പെയർലാൻഡിലുള്ള പുതിയ പാഴ്സനേജിലും സ്വീകരണം ഒരുക്കിയിരുന്നു. ഹൃദ്യമായ വരവേൽപിനു റവ. ജേക്കബ്. പി .തോമസ് നന്ദി പ്രകാശിപ്പിച്ചു.
റിപ്പോർട്ട്: ജീമോൻ റാന്നി
റവ. ജേക്കബ്. പി. തോമസിന് ഹൂസ്റ്റണിൽ സ്വീകരണം നൽകി
09:30 PM May 25, 2018 | Deepika.com