വൈക്കം: വൈക്കം - എറണാകുളം ദീർഘദൂര അതിവേഗഎസി ബോട്ട് സർവീസ് ഇന്ന് ഉദ്ഘാടനം ചെയ്യും. ഇന്ന് ഉച്ചകഴിഞ്ഞ് രണ്ടിനു ഗതാഗത മന്ത്രി എ.കെ.ശശീന്ദ്രന്റെ അധ്യക്ഷതയിൽ നടക്കുന്ന സമ്മേളനത്തിൽ ധനമന്ത്രി ഡോ.തോമസ് ഐസക് സർവീസ് ഉദ്ഘാടനം ചെയ്യും. എംഎൽഎ മാരായ സി.കെ. ആശ, എ.എം. ആരീഫ്, ജലഗതാഗതവകുപ്പ് സെക്രട്ടറി ഷാജി വി.നായർ, നഗരസഭ ചെയർമാൻ പി.ശശിധരൻ തുടങ്ങിയവർ സംബന്ധിക്കും.
ഉദ്ഘാടനച്ചടങ്ങ് ഉത്സവഭരിതമാക്കാൻ ജലഗതാഗത വകുപ്പും നഗരസഭയും ജനപങ്കാളിത്തത്തോടെ ഒരുക്കങ്ങൾ പൂർത്തിയാക്കി. സത്യഗ്രഹ സ്മാരക ഹാളിലാണ് സമ്മേളനം നടക്കുന്നത്. നാളെ രാവിലെ 7.30നു വൈക്കം ജെട്ടിയിൽ നിന്നു ബോട്ട് എറണാകുളത്തേക്കു പുറപ്പെടും. പെരുന്പളം സൗത്ത്, പാണാവള്ളി, തേവര ഫെറി, എന്നി സ്റ്റോപ്പുകളിലൂടെ കടന്ന് 9.30 ന് ബോട്ട് എറണാകുളത്തെത്തും.
വൈക്കം - എറണാകുളം യാത്രാ നിരക്ക് നോണ് എ സി 40 രൂപയും എസി 80 രൂപയുമാണ്. തേവര നോണ് എസി 30, എസി 60, പെരുന്പളം, പാണാവള്ളി നോണ് എസി 20, എസി 40. എറണാകുളം ജെട്ടിയിൽ നിന്നു തേവര ഫെറിയിലേയക്ക് നോണ് എസി 10 രൂപ, എസി 20 രൂപ.
കൂടുതൽ വിവരങ്ങൾക്ക് 9400050358, 94000503 48 എന്നീ നന്പറുകളിൽ ബന്ധപ്പെടണം.
വേഗ ഇന്നു മുതൽ കുതിപ്പു തുടങ്ങും
11:46 PM Nov 03, 2018 | Deepika.com