സുൽത്താൻ ബത്തേരി: ഓട്ടോ-ടാക്സി നിരക്ക് പുതുക്കി നിശ്ചയിക്കാനുള്ള നടപടി വൈകുന്നതിൽ പ്രതിഷേധിച്ച് സംയുക്ത ട്രേഡ് യൂണിയൻ സമരസമിതിയുടെ നേതൃത്വത്തിൽ അഞ്ചിന് സർക്കാർ ഓഫീസുകളിലേക്ക് മാർച്ച് നടത്തുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു.
നിരക്ക് പുതുക്കി നിശ്ചയിച്ചിട്ട് നാല് വർഷം കഴിഞ്ഞു. 2014ന് ശേഷം ഇന്ധനവില 40 ശതമാനത്തോളം വർധിച്ചു. സ്പെയർ പാർട്സിന്റെ വിലയിലും ഇൻഷ്വറൻസ്, ടാക്സ് എന്നിവയിലും വൻ വർധനവുണ്ടായി.
റോഡുകളുടെ മോശം അവസ്ഥ കാരണം വാഹനങ്ങൾ അടിക്കടി വർക്കുഷോപ്പുകളിൽ നിർത്തിയിടേണ്ട അവസ്ഥയാണ്. ജില്ലയിൽ മൂന്ന് ഇടങ്ങളിലാണ് മാർച്ച് നടത്തുന്നത്. ബത്തേരി മിനി സിവിൽ സ്റ്റേഷനിലേക്ക് നടത്തുന്ന മാർച്ച് രാവിലെ 10ന് ആരംഭിക്കും. 12ന് ശേഷം ഓട്ടോകൾ നിരത്തിലിറങ്ങുമെന്നും ഭാരവാഹികൾ പറഞ്ഞു. വാർത്താസമ്മേളനത്തിൽ ഭാരവാഹികളായ അനീഷ് ബി. നായർ, വി.എ. അബാസ്, ഇബ്രാഹിം തൈത്തൊടി, ജിനേഷ്, വർഗീസ്, പി. അഷ്റഫ്, ആന്റപ്പൻ എന്നിവർ പങ്കെടുത്തു.
നിരക്ക് വർധന: ഓട്ടോ-ടാക്സി തൊഴിലാളികൾ പ്രക്ഷോഭത്തിലേക്ക്
11:58 PM Nov 02, 2018 | Deepika.com