ന്യൂഡൽഹി: ഔദ്യോഗിക വസതി ഒഴിയണമെന്ന ലോക്സഭ ഹൗസിംഗ് പാനലിന്റെ നോട്ടീസിനു മറുപടി നൽകി കോണ്ഗ്രസ് നേതാവ് രാഹുൽഗാന്ധി. എംപി സ്ഥാനത്തുനിന്ന് അയോഗ്യനാക്കിയതിനെത്തുടർന്ന് തുഗ്ലക് മാർഗിലെ 12-ാം നന്പർ വസതി ഒഴിയണമെന്നാണു രാഹുൽ ഗാന്ധിക്കു ലഭിച്ച നിർദേശം.
കഴിഞ്ഞ നാലു തവണയും എംപിയായി തെരഞ്ഞെടുക്കപ്പെട്ടതിനെത്തുടർന്ന് താമസിച്ചുവന്നിരുന്ന വസതിയിൽ ചെലവഴിച്ച സമയത്തിന് ജനങ്ങളോടു കടപ്പെട്ടിരിക്കുന്നുവെന്ന് രാഹുൽ ഗാന്ധി പറഞ്ഞു. നോട്ടീസിൽ ആവശ്യപ്പെടുന്നതനുസരിച്ച് വസതി ഒഴിയുന്നതിന് തയാറാണെന്നും അദ്ദേഹം വ്യക്തമാക്കി.
വിവാദ മോദിപരാമർശത്തിലുള്ള സൂറത്ത് ജുഡീഷൽ മജിസ്ട്രേറ്റ് കോടതി വിധിയെ തുടർന്ന് കഴിഞ്ഞ വെള്ളിയാഴ്ചയാണു രാഹുൽ ഗാന്ധിയെ ലോക്സഭ സെക്രട്ടേറിയറ്റ് എംപിസ്ഥാനത്തുനിന്ന് അയോഗ്യനാക്കിയത്. പ്രതികാര രാഷ്ട്രീയമാണു വസതി ഒഴിയണമെന്ന് ആവശ്യപ്പെട്ടുള്ള നോട്ടീസിനു പിന്നിലെന്ന കോണ്ഗ്രസ് നേതാക്കളുടെ ആരോപണം ബിജെപി തള്ളി.
വസതി ഒഴിയാൻ തയാർ; നോട്ടീസിന് രാഹുലിന്റെ മറുപടി
12:42 AM Mar 29, 2023 | Deepika.com