ന്യൂഡൽഹി: പടിഞ്ഞാറൻ ഡൽഹിയിൽ കെട്ടിടത്തിനു തീപിടിച്ച് 26 പേർ വെന്തു മരിച്ചു. മുൻഡ്ക മെട്രോ സ്റ്റേഷനു സമീപമുള്ള മൂന്നു നില കെട്ടിടത്തിലാണ് ഇന്നലെ വൈകുന്നേരം 4.40നു തീപിടിത്തമുണ്ടായത്. മരണസംഖ്യ ഇനിയും ഉയർന്നേക്കാം.
മുപ്പതിലേറെ പേർക്കു പരിക്കേറ്റു. എഴുപതോളം പേരെ കെട്ടിടത്തിൽനിന്നു രക്ഷപ്പെടുത്തി. ഏതാനും പേർ കെട്ടിടത്തിനകത്ത് ഉൾപ്പെട്ടിട്ടുണ്ടെന്നു പോലീസ് ഡെപ്യൂട്ടി കമ്മീഷണർ(ഔട്ടർ) സമീർ ശർമ പറഞ്ഞു. 16 മൃതദേഹങ്ങൾ കണ്ടെടുത്തു. തീപിടിത്തമുണ്ടായ ഉടൻ ചിലർ കെട്ടിടത്തിൽനിന്ന് ചാടി രക്ഷപ്പെടാൻ ശ്രമിച്ചു.
രാത്രി വൈകിയും തീയണയ്ക്കാനുള്ള ശ്രമം നടന്നുവരികയാണ്. കെട്ടിടം മുഴുവൻ അഗ്നിക്കിരയായി. വിവിധ കന്പനികളുടെ ഓഫീസായി ഉപയോഗിച്ചിരുന്ന കെട്ടിടമാണിത്.
ഡൽഹിയിൽ കെട്ടിടത്തിനു തീപിടിച്ച് 26 പേർ മരിച്ചു
01:18 AM May 14, 2022 | Deepika.com