രാഹുൽ ഗോപിനാഥ്
ന്യൂഡൽഹി: എൻജിനിയറിംഗ്, സയൻസ് വിദ്യാർഥികൾക്ക് ഇന്ത്യൻ ജ്ഞാനവ്യവസ്ഥയിൽ പരിശീലനം നൽകുന്ന പുതിയ പാഠപുസ്തകം തയാറാക്കി കേന്ദ്രസർക്കാർ. കേന്ദ്ര വിദ്യാഭ്യാസ വകുപ്പ് മന്ത്രി ധർമേന്ദ്ര പ്രധാൻ 16ന് ഡൽഹിയിലെ എഐസിടിഇ (ഓൾ ഇന്ത്യ കൗണ്സിൽ ഓഫ് ടെക്നിക്കൻ എഡ്യൂക്കേഷൻ) ഓഡിറ്റോറിയത്തിൽ പ്രകാശനം ചെയ്യും.
ഭഗവദ്ഗീത ഉൾപ്പെടെയുള്ള പുരാതന ഇന്ത്യൻ ജ്ഞാനസ്രോതസുകൾ ഉപയോഗിച്ച് പുതിയ മാനേജ്മെന്റ് മാതൃക രൂപീകരിക്കുന്നതിനും ജോലിയെ ആത്മീയമായി സമീപിക്കുന്നതിനും പുസ്തകം പരിശീലനം നൽകുന്നു.
കേന്ദ്രത്തിന്റെ മേൽനോട്ടത്തിലുള്ള ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്മെന്റ് (ഐഐഎം) പ്രഫസർ ബി. മഹാദേവന്റെയും ബംഗളൂരു ആസ്ഥാനമാക്കി പ്രവർത്തിക്കുന്ന സ്വാമി വിവേകാനന്ദ യോഗ സർവകലാശാലയുടെയും എറണാകുളം ആസ്ഥാനമായി പ്രവർത്തിക്കുന്ന കൽപിത സർവകലാശാലയായ ചിന്മയ വിശ്വവിദ്യാപീഠത്തിന്റെയും നേതൃത്വത്തിലാണ് പുസ്തകം തയാറാക്കിയത്.
സാങ്കേതികവിദ്യാഭ്യാസത്തിന്റെ ചുമതലയുള്ള എഐടിസിഇ 2018ൽ മാതൃകാ പാഠ്യപദ്ധതിയിൽ അവതരിപ്പിച്ച ‘സാർവത്രിക മാനുഷികമൂല്യങ്ങളും ഇന്ത്യൻ ജ്ഞാനവ്യവസ്ഥയും’ എന്ന വിഷയം പഠിപ്പിക്കുന്നതിനുള്ള പ്രാഥമിക റഫറൻസ് മെറ്റീരിയലായി ഉപയോഗിക്കാനാണ് പുസ്തകം രൂപകൽപന ചെയ്തിട്ടുള്ളത്.
ഇന്ത്യൻ ജ്ഞാനവ്യവസ്ഥയിൽ പുതിയ പാഠപുസ്തകം തയാറാക്കി കേന്ദ്രസർക്കാർ
01:18 AM May 14, 2022 | Deepika.com