വൈപ്പിൻ: എടവനക്കാട് എസ്ഡിപിവൈ കെപിഎം ഹൈസ്കൂളിൽ ജൂണിയർ റെഡ്ക്രോസ് യൂണിറ്റിന്റെ നേതൃത്വത്തിൽ സംഘടിപ്പിച്ച ഹെയർ ടു ഹെൽപ് എന്ന കേശദാന കാന്പയിനിൽ സ്കൂൾ വിദ്യാർഥികളും രക്ഷിതാക്കളും അധ്യാപികമാരും കേശദാനം നടത്തി.
അസീസി വിദ്യാനികേതനിലെ മൂന്നാം ക്ലാസ് വിദ്യാർഥിനിയായ മെൽന റോസ്ലറ്റായിരുന്നു കേശദാനത്തിനെത്തിയ ഏറ്റവും ചെറിയ കുട്ടി. 41 വിദ്യാർഥിനികൾ, 7 രക്ഷകർത്താക്കൾ, സ്ക്കൂളിലെ തന്നെ മൂന്ന് അധ്യാപകർ ഉൾപ്പടെ 51 പേരാണ് കേശദാനം നടത്തിയത്. ഇതേക്കുറിച്ച് കേട്ടറിഞ്ഞ നാട്ടുകാരായ പെണ്കുട്ടികളും പൊതുജനങ്ങളും പരിപാടിക്ക് പിന്തുണയേകാനെത്തി. പുരുഷപക്ഷത്തുനിന്ന് കെ.പി. ആദിത്യനും ഹെയർ ടു ഹെൽപ് കാന്പയിനിൽ പങ്കുചേർന്നു. ശേഖരിച്ച തലമുടി തൃശൂർ ചേലക്കാട്ടുകാര സ്വദേശിയായ എബി മാത്യുവിന്റെ നേതൃത്വത്തിൽ പ്രവർത്തിക്കുന്ന മിറക്കിൾ ചാരിറ്റബിൾ അസോസിയേഷന്റെ ഹെയർ ബാങ്കിന് കൈമാറും.
കാൻസർ ചികിത്സ നടത്തുന്ന നിർധന കുടുംബങ്ങളിൽപ്പെട്ടവർക്ക് സൗജന്യമായി വിഗ് നിർമിച്ചു നൽകുന്നതിനായാണ് ഇത്തരമൊരു പ്രോഗ്രാം സ്കൂളിൽ സംഘടിപ്പിച്ചത്. എംഎൽഎ എസ്. ശർമ ചടങ്ങ് ഉദ്ഘാടനം ചെയ്തു. പിടിഎ പ്രസിഡന്റ് എം.ബി. അയൂബ് അധ്യക്ഷനായി.
കാൻസർ ബാധിതർക്കായി മുടി മുറിച്ചു നൽകി മാതൃകയായി വിദ്യാർഥികൾ
01:15 AM Feb 24, 2018 | Deepika.com