ന്യൂഡൽഹി: കേദാർനാഥ് തീർഥാടന കേന്ദ്രത്തിനു സമീപം തകർന്നുവീണ സ്വകാര്യ ഹെലികോപ്റ്ററിനെ വ്യോമസേനാ ഹെലികോപ്റ്ററുകളുടെ സഹായത്തോടെ പ്രദേശത്തുനിന്ന് നീക്കി.
യുടി എയർ പ്രൈവറ്റ് ലിമിറ്റഡിന്റെ ഹെലികോപ്റ്റർ സെപ്റ്റംബർ 23 ആണ് 11,500 അടി ഉയരമുള്ള പ്രദേശത്ത് തകർന്നുവീണത്. ഹെലികോപ്റ്റർ തകർന്നുവീണ പ്രദേശത്തേക്ക് കാൽനടയായി മാത്രമേ ചെല്ലാൻ സാധിക്കൂ. ഇതിനെത്തുടർന്നാണ് ഹെലികോപ്റ്റർ കന്പനി വ്യോമസേനയുടെ സഹായം തേടിയത്.
എംഐ-17 വി അഞ്ച് ഹെലികോപ്റ്ററുകളാണ് ദൗത്യത്തിൽ പങ്കെടുത്തത്. ഒരു ഹെലികോപ്റ്റർ സാങ്കേതിക സഹായം നൽകിയപ്പോൾ, മറ്റൊന്ന് മലയിടുക്കിൽനിന്ന് തകർന്ന ഹെലികോപ്റ്ററിനെ കെട്ടിവലിച്ച് പറന്നു. കേദാർനാഥിൽനിന്ന് ഫതയിലേക്ക് ആറു തീർഥാടകരുമായി പോയ ഹെലികോപ്റ്ററാണ് അപകടത്തിൽ പെട്ടത്.
ഹെലിപ്പാഡിൽനിന്ന് ഉയർന്ന ഹെലികോപ്റ്റർ സാങ്കേതിക തകരാറിനെത്തുടർന്ന് അടിയന്തരമായി നിലത്തിറക്കുകയായിരുന്നു. ഹെലികോപ്റ്ററിലുണ്ടായിരുന്നവർ പരിക്കേൽക്കാതെ രക്ഷപ്പെട്ടു.
തകരാറിലായ ഹെലികോപ്റ്ററുമായി പറന്ന് വ്യോമസേനാ ഹെലികോപ്റ്റർ
12:47 AM Oct 28, 2019 | Deepika.com