ന്യൂഡൽഹി: റെയിൽവേ ജീവനക്കാർക്ക് 78 ദിവസത്തെ വേതനം ബോണസായി നൽകാൻ കേന്ദ്ര മന്ത്രിസഭാ യോഗത്തിന്റെ തീരുമാനം. ഉത്സവ സീസണിന്റെ ഭാഗമായാണ് ബോണസ് നൽകുന്നതെന്നും ഉത്പാദന ക്ഷമതയ്ക്കുള്ള പാരിതോഷികമാണിതെന്നും കേന്ദ്രമന്ത്രിസഭാ യോഗത്തിനുശേഷം കേന്ദ്ര വാർത്താവിതരണ മന്ത്രി പ്രകാശ് ജാവഡേക്കർ അറിയിച്ചു. ആറ് വർഷമായി ഈ ബോണസ് നൽകുന്നുണ്ടെന്നും 11,52,000 ജീവനക്കാർക്ക് ഇതിന്റെ ഗുണം ലഭിക്കുമെന്നും അദ്ദേഹം വിശദമാക്കി.
ബോണസ് നൽകുന്നതിലൂടെ 2,024.40 കോടി രൂപയുടെ അധിക ചെലവുണ്ടാകുമെന്നാണ് കണക്കാക്കിയിരിക്കുന്നത്. ജീവനക്കാരുടെ കാര്യക്ഷമത കൊണ്ടാണ് ഉത്പാദനം വർധിച്ചതെന്നും അതിനാലാണ് ബോണസ് നൽകുന്നതെന്നും സർക്കാർ വിശദമാക്കുന്നു.
റെയിൽവേ ജീവനക്കാർക്ക് ഈ ബോണസിന്റെ ഗുണമുണ്ടാകുമെങ്കിലും റെയിൽവേ പ്രൊട്ടക്ഷൻ ഫോഴ്സ് (ആർപിഎഫ്), റെയിൽവേ സ്പെഷ്യൽ ഫോഴ്സ് (ആർപിഎസ്എഫ്) എന്നീ വിഭാഗങ്ങളെ ഇതിൽ ഉൾപ്പെടുത്തിയിട്ടില്ല.
റെയിൽവേ ജീവനക്കാർക്ക് 78 ദിവസത്തെ വേതനം ബോണസായി നൽകും
11:43 PM Sep 18, 2019 | Deepika.com