ന്യൂഡൽഹി: ഭീകരസംഘടനയിൽനിന്ന് രാജ്യസേവകനായി മാറി വീരമൃത്യു വരിച്ച ലാൻസ് നായിക് നസീർ അഹമ്മദ് വാനിക്കാണ് പരമോന്നത സൈനിക ബഹുമതിയായ അശോക ചക്രം ലഭിച്ചത്. മൂന്നു പേർക്ക് മരണാനന്തര ബഹുമതിയായി ഉൾപ്പടെ നാല് പേർക്ക് കീർത്തി ചക്രയും പതിനൊന്നു പേർക്ക് ശൗര്യ ചക്രയും 28 പേർക്ക് പരമ വിശിഷ്ട സേവാ മെഡലും ലഭിച്ചു. കരസേനാ മേധാവി ജനറൽ ബിപിൻ റാവത്തിന് പരമവിശിഷ്ട സേവാ മെഡലും ലഭിച്ചിട്ടുണ്ട്.
രഘുനാഥ് നന്പ്യാർക്ക് പരമവിശിഷ്ട സേവാ മെഡൽ
ഫ്രാൻസിൽ റഫാൽ യുദ്ധവിമാന പരീക്ഷണ പറക്കൽ നടത്തിയ വ്യോമസേന ഈസ്റ്റ് കമാൻഡ് മേധാവി എയർമാർഷൽ രഘുനാഥ് നന്പ്യാർക്ക് പരമവിശിഷ്ട സേവാ മെഡൽ. കണ്ണൂർ വിമാനത്താവളത്തിൽ ആദ്യമായി പരീക്ഷണ പറക്കൽ നടത്തിയ വിമാനം പറത്തിയത് കണ്ണൂർ സ്വദേശിയായ രഘുനാഥ് നന്പ്യാരായിരുന്നു. എയർ മാർഷൽ സുരേഷ് ബാലകൃഷ്ണനും പരമ വിശിഷ്ട സേവ മെഡൽ ലഭിച്ചിട്ടുണ്ട്.
മേജർ അന്നക്കുട്ടിക്ക് വിശിഷ്ടസേവാ മെഡൽ
മിലിട്ടറി നഴ്സിംഗ് സർവീസ് അഡിഷണൽ ഡയറക്ടർ ജനറൽ മേജർ ജനറൽ അന്നക്കുട്ടി ബാബുവിന് വിശിഷ്ട സേവ മെഡൽ ലഭിച്ചു. പത്തനംതിട്ട അടൂർ പെരിങ്ങനാട് കരൂർ കുടുംബാംഗമാണ്. ഭർത്താവ് ബാബു ജോർജ് (റിട്ട.എഎംസി). മേജർ. ബൈജു ബാബു എക മകനാണ്. മേജർ അന്നക്കുട്ടി ബാബുവിന് അടുത്തിടെ ഫ്ലോറൻസ് നൈറ്റിംഗേൽ അവാർഡും ലഭിച്ചിരുന്നു.
മലയാളിത്തിളക്കം
എയർ കമ്മഡോർ ജോർജ് തോമസിന് അതിവിശിഷിഷ്ട സേവാ മെഡൽ ലഭിച്ചു. സുബേദാർ മേജർ ബി. കരുണാകരൻ, വ്യോമസേനയിലെ ഗ്രൂപ്പ് ക്യാപ്റ്റൻ രാജഗോപാൽ വരദരാജൻ, ബോർഡർ റോഡ് ഓർഗനൈസേഷനിലെ കെ.പി പുരുഷോത്തമൻ എന്നിവർക്ക് വിശിഷ്ട സേവ മെഡലും ലഭിച്ചു.
മേജർ സന്ദീപ് കുറുപ്പ് (മദ്രാസ് റജിമെന്റ്), മേജർ ദിലീപ് ഉണ്ണി (രാഷ്ട്രീയ റൈഫിൾസ്), മേജർ വിനീഷ് നായർ (രാഷ്ട്രീയ റൈഫിൾസ്), മേജർ രവി കുമാർ, ക്യാപ്റ്റൻ അനിൽ കുമാർ, ക്യാപ്റ്റൻ അഖിൽ രാധാകൃഷ്ണൻ, ഹവീൽദാർ മനീഷ് കുമാർ എന്നിവർക്കു ധീരതയ്ക്കുള്ള സേനാ പുരസ്കാരം ലഭിച്ചു.
ആത്മാർഥ സേവനത്തിനുള്ള സേനാ മെഡലുകൾ മേജർ ജനറൽ പി.എൻ അനന്തനാരായണൻ, മേജർ ജനറൽ ഉണ്ണികൃഷ്ണൻ നായർ, മേജർ ജനറൽ നാരായണൻ, വായുസേനയിലെ ഗ്രൂപ്പ് ക്യാപ്റ്റൻ ഉദയൻ കുമാർ, ഗ്രൂപ്പ് ക്യാപ്റ്റൻ രമേഷ് ഷണ്മുഖൻ എന്നിവർക്കും ലഭിച്ചു.
നസീർ അഹമ്മദ് വാനിക്ക് അശോക ചക്ര
12:27 AM Jan 26, 2019 | Deepika.com