പനമരം: പനമരം നിരട്ടാടി റോഡിൽ കോട്ടക്കുന്ന് ജംഗ്ഷനിൽ പ്രവർത്തനം ആരംഭിച്ച വിദേശ മദ്യശാല അടച്ച് പൂട്ടണമെന്നാവശ്യപ്പെട്ട് ജനകീയ കമ്മിറ്റിയുടെ നേതൃത്വത്തിൽ മദ്യശാല പ്രവർത്തിക്കുന്ന കെട്ടിടത്തിന് മുന്പിൽ നാട്ടുകാർ ഉപരോധസമരം നടത്തി.
ബ്ലോക്ക് പഞ്ചായത്ത്, പനമരം പഞ്ചായത്ത്, ക്ഷേത്രം, വിദ്യാഭ്യാസ സ്ഥാപനങ്ങൾ തുടങ്ങിവയ്ക്ക സമീപം ജനവാസ കേന്ദ്രത്തിൽ സ്വകാര്യ വ്യക്തിയുടെ കെട്ടിടത്തിൽ മദ്യശാല തുടങ്ങിയത് മുതൽ ജനങ്ങൾ ദുരിത്തിലായി. നിരട്ടാടി റൂട്ടിലൂടെ സ്ത്രീകൾക്കും കുട്ടികൾക്കും സഞ്ചരിക്കാൻ പോലും പറ്റാത്ത സാഹചര്യമാണ്.
മദ്യശാലയ്ക്ക് സ്ഥലവും കെട്ടിടവും വിട്ട് നല്കിയത് പഞ്ചായത്ത് വൈസ് പ്രസിഡന്റാണെന്ന് നാട്ടുകാർ ആരോപിച്ചു. ഇദ്ദേഹത്തിന്റെ മകന്റെ പേരിലുള്ളതാണ് കെട്ടിടവും സ്ഥലവും. നേരത്തെ മദ്യശാല ആരംഭിക്കാൻ നീക്കം നടന്നുവെങ്കിലും ഈ സ്ഥലം നല്കിലെ്ലന്ന മറുപടിയാണ് വൈസ് പ്രസിഡന്റ് മറ്റ് ജനപ്രതിനിധികൾക്കും നാട്ടുകാർക്കും നല്കിയിരുന്നത്. രഹസ്യമായാണ് ഷോപ്പ് തുടങ്ങാൻ കെട്ടിടം വിട്ടു നല്കിയത്.
ജനങ്ങളെ വഞ്ചിച്ച വൈസ് പ്രസിഡന്റ് മാപ്പ് പറഞ്ഞ് ബീവറേജ് അധികൃതരുമായിട്ടുള്ള കരാറിൽ നിന്ന് പിൻവാങ്ങും വരെ പ്രക്ഷോഭം നടത്താനാണ് ജനകീയ കമ്മറ്റി തീരുമാനം.
പ്രക്ഷോഭങ്ങളുടെ തുടക്കമെന്ന നിലയിലാണ് ഇന്നലെ വൈകിട്ട് മൂന്നോടെ നാട്ടുകാർ ജനകീയ കമ്മിറ്റി രൂപീകരിച്ച് മദ്യശാലയ്ക്ക് മുന്പിൽ ഉപരോധസമരം നടത്തിയത്.
മദ്യശാല കോട്ടക്കുന്നിൽ പ്രവർത്തിപ്പിക്കാൻ ഒരു കാരണവശാലും അനുവദിക്കില്ല.
ജനങ്ങളെ വഞ്ചിച്ച വൈസ്് പ്രസിഡന്റിനെ സ്ത്രീകളും കുട്ടികളും ചേർന്ന് വഴിയിൽ തടയുന്നതടക്കമുള്ള സമരങ്ങൾ വരും ദിവസങ്ങളിൽ നടത്തുമെന്നും ജനകിയ കമ്മിറ്റി ഭാരവാഹികൾ പറഞ്ഞു.
വിദേശമദ്യശാലയ്ക്ക് മുന്പിൽ നടത്തിയ സമരം ജില്ലാ പഞ്ചായത്ത് വൈസ് പ്രസിഡന്റ് പി.കെ. അസ്മത്ത് ഉദ്ഘാടനം ചെയ്തു. പഞ്ചായത്ത് പ്രസിഡന്റ് ലിസി തോമസ്, സാബു, ജുൽനാ ഉസ്മാൻ, ബെന്നി അരിഞ്ചേർമല, പി.ജെ. ബേബി, അസീസ് കുനിയിൽ, ജോസഫ് മുട്ടുമന തുടങ്ങിയവർ പ്രസംഗിച്ചു.
ജനകീയ കമ്മിറ്റി ഉപരോധസമരം സംഘടിപ്പിച്ചു
12:18 AM Apr 05, 2017 | Deepika.com