മദ്യശാലക്കു മുന്നിൽ അക്രമംനടത്തിയ യുവാക്കളെ നാട്ടുകാർ തല്ലിയോടിച്ചു
10:34 PM Apr 04, 2017 | Deepika.com
രാജകുമാരി: പൂപ്പാറ മദ്യഷാപ്പിനു മുന്നിൽ സംഘർഷമുണ്ടാക്കാൻ ശ്രമിച്ച യുവാക്കളെ നാട്ടുകാർ പിടികൂടി പോലീസിനു കൈമാറി. ഇന്നലെ രാവിലെ 11-നോടെയാണ് സംഭവം. മദ്യവിൽപനശാലയിൽ മദ്യം വാങ്ങാനെത്തിയ യുവാക്കൾ സഞ്ചരിച്ച വാഹനം വഴിയാത്രക്കാരിയെ ഇടിക്കുന്ന സാഹചര്യമുണ്ടായപ്പോൾ നാട്ടുകാരിൽ ചിലർ യുവാക്കളെ തടഞ്ഞുനിർത്തി മുന്നറിയിപ്പുനൽകി വിട്ടയച്ചു. ഒന്നര മണിക്കൂറിനുശേഷം യുവാക്കൾ കൂടുതൽ ആയുധങ്ങളുമായി സംഘടിച്ചെത്തി പ്രദേശത്ത് ഭീതിപരത്തി. സ്ഥലത്തുണ്ടായിരുന്ന നാട്ടുകാരോട് മോശമായി പെരുമാറുകയും ചെയ്തു. ഇതോടെ നാട്ടുകാർ സംഘടിച്ച് യുവാക്കളെ അടിച്ചോടിച്ചു. നാട്ടുകാർ വിവരമറിയിച്ചതിനെതുടർന്ന് സ്ഥലത്തെത്തിയ ശാന്തന്പാറ പോലീസ് യുവാക്കളെ കസ്റ്റഡിയിലെടുത്തു. കേസെടുത്തിട്ടില്ലെന്ന് പോലീസ് അറിയിച്ചു.