പത്മവിലാസം ലെയ്നിൽ പുതിയ പൈപ്പ് ലൈൻ സ്ഥാപിച്ചു; കുടിവെള്ള പ്രശ്നത്തിനു പരിഹാരമായി
11:53 PM Mar 30, 2017 | Deepika.com
പേരൂർക്കട: വഴയില പത്മവിലാസം ലെയിനിൽ പുതിയ കുടിവെള്ള പൈപ്പ് ലൈൻ സ്ഥാപിച്ചു. ഇതോടെ വർഷങ്ങളായി നീണ്ടുനിന്ന കുടിവെള്ള പ്രശ്നത്തിനു ശാശ്വതപരിഹാരമായി. പേരൂർക്കട ടാങ്കിൽനിന്നു പഴയ പൈപ്പിലൂടെയായിരുന്നു ഇവിടേക്കുള്ള ജലവിതരണം. വെള്ളത്തിന്റെ ഒഴുക്കു കുറവായിരുന്നതിനാൽ കഴിഞ്ഞ ഒരു വർഷമായി ഇവിടെ കുടിവെള്ളം ലഭ്യമല്ലായിരുന്നു. ഇതിനിടെ നിരവധി തവണ അറ്റകുറ്റപ്പണിയും പരിശോധനയും ഈ ഭാഗത്തു നടത്തിയെങ്കിലും കുടിവെള്ളത്തിനു പരിഹാരം കാണാനായില്ല. ഒടുവിൽ എക്സിക്യൂട്ടീവ് എൻജിനിയർ സുരേഷിന്റെ നേതൃത്വത്തിലുള്ള സംഘം മണിക്കൂറുകളോളം പരിശ്രമിച്ചാണ് പ്രശ്നം പരിഹരിച്ചത്. പേരൂർക്കട ടാങ്കു മുതൽ പുതിയ ലൈൻ സ്ഥാപിച്ചാണ് കുടിവെള്ള പ്രശ്നം ശാശ്വതമായി പരിഹരിച്ചത്.