ചെങ്ങന്നൂർ: ആംബുലൻസിനുള്ളിൽ സിബിഎസ്ഇ പത്താം ക്ലാസ് പരീക്ഷയെഴുതി വിദ്യാർഥി. കോടുകുളഞ്ഞി രാജരാജേശ്വരി സീനിയർ സെക്കൻഡറി സ്കൂളിലെ പത്താം ക്ലാസ് വിദ്യാർഥിയായ മുഹമ്മദ് ഷെറീഫ്(15)ആണ് അവശനിലയിലും പരീക്ഷാ കേന്ദ്രമായ മുളക്കുഴ സെന്റ് ഗ്രിഗോറിയോസ് സീനിയർ സെക്കൻഡറി സ്കൂളിലെത്തി ഇംഗ്ലീഷ് പരീക്ഷ എഴുതിയത്.
കഴിഞ്ഞ ദിവസം ബൈക്കപകടത്തിൽ പരിക്കേറ്റ മുഹമ്മദ് ഷെറീഫിനു പരീക്ഷയെഴുതാൻ പ്രയാസം നേരിടുന്നതു കണ്ടു സ്കൂൾ മാനേജ്മെന്റും രക്ഷകർത്താക്കളും മുൻകൈയെടുത്ത് ക്രമീകരണം ഏർപ്പെടുത്തുകയായിരുന്നു.
പ്രത്യേക അനുമതി വാങ്ങി ആംബുലൻസിൽ ഇന്നലെ രാവിലെ ഒന്പതോടെ പരീക്ഷാകേന്ദ്രത്തിലെത്തി.അപകടത്തിൽ ഇരുകൈകൾക്കും കാലിനും തലയ്ക്കും മുഹമ്മദ് ഷെറീഫിന് പരിക്കേറ്റിരുന്നു. പഠനത്തിൽ മികവു പുലർത്തിയിരുന്ന മുഹമ്മദ് ഷെറീഫിന് പരീക്ഷ എഴുതാനുള്ള എല്ലാ സൗകര്യങ്ങളും ക്ലാസ് ടീച്ചർ കൂടിയായ സിന്ധു കെ. പിള്ളയുടെ നേതൃത്വത്തിലുള്ള അദ്ധ്യാപകർ ഏർപ്പെടുത്തി.
പരീക്ഷാ ഡ്യൂട്ടിയിലുണ്ടായിരുന്ന അധ്യാപിക ആംബുലൻസിനു സമീപം മേൽനോട്ടം വഹിച്ചു. കൈയിലെ പരിക്കുകാരണം പേന പിടിച്ച് എഴുതാൻ ബുദ്ധിമുട്ട് ഉണ്ടായെങ്കിലും നല്ല രീതിയിൽ ഇംഗ്ലീഷ് പരീക്ഷ എഴുതാൻ സാധിച്ചെന്ന് മുഹമ്മദ് ഷെരീഫ് പറഞ്ഞു.
ബൈക്ക് അപകടത്തിൽ പരിക്കേറ്റ വിദ്യാർഥി ആംബുലൻസിൽ പരീക്ഷ എഴുതി
11:14 PM Mar 30, 2017 | Deepika.com