കരിമണ്ണൂര്: സെന്റ് ജോസഫ് ഹയര്സെക്കന്ഡറി സ്കൂളിലെ വിദ്യാര്ഥികളായ അമ്മുവിനും അല്ലുവിനും ജേക്കബിനും സ്വപ്നഭവനം സ്വന്തമായി.
സഹപാഠിക്കൊരു സ്നേഹവീട് എന്ന പദ്ധതിയുടെ ഭാഗമായി സ്കൂളിലെ എന്എസ്എസ് യൂണിറ്റിന്റെ നേതൃത്വത്തില് സ്കൗട്ട് ആന്ഡ് ഗൈഡ്, സൗഹൃദ ക്ലബ്, പിടിഎ, അധ്യാപക അനധ്യാപകര്, വിദ്യാര്ഥികള് എന്നിവരുടെ സഹകരണത്തോടെ നിര്മിച്ചു നല്കുന്ന വീടിന്റെ താക്കോല്ദാനം ഇന്നലെ സ്കൂളില് ചേര്ന്ന ചടങ്ങില് കോതമംഗലം രൂപതാധ്യക്ഷന് മാര് ജോര്ജ് മഠത്തിക്കണ്ടത്തില് നിര്വഹിച്ചു.
കരിമണ്ണൂര് ഹയര്സെക്കന്ഡറി സ്കൂളിലെ കുട്ടികള് ഈ പദ്ധതി പ്രകാരം മൂന്നു ഭവനങ്ങള് മൂന്നുവര്ഷമായി പണിതു നല്കി. ഈ വര്ഷം വാടകക്കെട്ടിടത്തില് താമസിക്കുന്ന അമ്മുവിനും അല്ലുവിനും ജേക്കബിനും മാതാപിതാക്കള്ക്കുമായി നാലു സെന്റ് ഭൂമിയില് വീടു നിര്മിച്ചു നല്കുകയായിരുന്നു.
ഇന്നു സര്വീസില് നിന്നും വിരമിക്കുന്ന പ്രിന്സിപ്പല് മാത്യു സ്റ്റീഫന്റെ നേതൃത്വത്തിലാണു ഈ ഭവനങ്ങള് പണിതീര്ത്തത്. എംഎല്എ ഫണ്ടില്നിന്നും അനുവദിച്ച അഞ്ചുലക്ഷം രൂപ ഉപയോഗിച്ച് ഹയര്സെക്കന്ഡറി വിഭാഗത്തിനായി നിര്മിച്ച കംപ്യൂട്ടര് ലാബിന്റെയും രണ്ടു ലക്ഷം രൂപ ഉപയോഗിച്ച് നവീകരിച്ച – ശീതീകരിച്ച ഹൈസ്കൂള് ലാബിന്റെയും ഉദ്ഘാടനം പി.ജെ. ജോസഫ് എംഎല്എ നിര്വഹിച്ചു.
കരിമണ്ണൂര് പഞ്ചായത്ത് പ്രസിഡന്റ് ടോജോ പോള്, വൈസ് പ്രസിഡന്റ് ആന്സി ടീച്ചര്, പഞ്ചായത്ത് മെംബര് ദേവസ്യ, പിടിഎ പ്രസിഡന്റ് ജോസ് മാത്യു, എംപിടിഎ പ്രസിഡന്റ് ടി.ജി. റീജ, മുന് പഞ്ചായത്ത് പ്രസിഡന്റ് പോള് കുഴിപിള്ളില്, ഹെഡ്മാസ്റ്റര് ജോയിക്കുട്ടി ജോസഫ് എന്നിവര് പ്രസംഗിച്ചു. പ്രിന്സിപ്പല് മാത്യു സ്റ്റീഫന് സ്വാഗതവും, എന്എസ്എസ് പ്രോഗ്രാം ഓഫീസര് ബിന്ദു പി. കുര്യാക്കോസ് നന്ദിയും പറഞ്ഞു.
സ്നേഹവീടിന്റെ താക്കോൽദാനം നടത്തി
10:55 PM Mar 30, 2017 | Deepika.com