തിരുവനന്തപുരം: വിവിധ വകുപ്പുകളുമായി ബന്ധപ്പെട്ട് ജനങ്ങളുടെ പരാതികൾക്ക് അടിയന്തര തീർപ്പ് കൽപ്പിക്കുന്നതിന് സർക്കാർ വിഭാവനം ചെയ്ത പരാതിപരിഹാര വേദി ഇന്ന് നടക്കും. തിരുവനന്തപുരം താലൂക്കിലെ 31 വില്ലേജുകൾ കേന്ദ്രീകരിച്ചുള്ള പരാതികളാണ് ജില്ലാ കളക്ടറുടെ നേതൃത്വത്തിൽ പരിഗണിക്കുക. താലൂക്കിലെ പൊതുജനങ്ങൾക്ക് വേദിയിൽ നേരിട്ട് പരാതികൾ സമർപ്പിക്കാവുന്നതാണ്. പരാതിപരിഹാര വേദി രാവിലെ 10 ന് പഞ്ചായത്ത് അസോസിയേഷൻ ഹാളിൽ മന്ത്രി കടകംപള്ളി സുരേന്ദ്രൻ ഉദ്ഘാടനം ചെയ്യും. ഡെപ്യൂട്ടി സ്പീക്കർ വി. ശശി അധ്യക്ഷത വഹിക്കും. ഓരോ വകുപ്പുകൾക്കും പ്രത്യേക കൗണ്ട റുകൾ പ്രവർത്തിക്കും.
ഈ കൗണ്ടറുകളിൽ വച്ചുതന്നെ പരമാവധി പരാതികൾ തീർപ്പാക്കാൻ ശ്രമിക്കണമെന്ന് ജില്ലാ കളക്ടർ എസ്. വെങ്കടേസപതി ഉദ്യോഗസ്ഥർക്ക് നിർദേശം നൽകിയിട്ടുണ്ട്. പരാതിപരിഹാര വേദിയിൽ ജില്ലാ കളക്ടർ, സബ്കളക്ടർ ഡോ. ദിവ്യ.എസ്. അയ്യർ, ഡെപ്യൂട്ടി കളക്ടർമാർ, വിവിധ വകുപ്പുകളിലെ ജില്ലാ-താലൂക്ക് തല ഉദ്യോഗസ്ഥർ എന്നിവർ സംബന്ധിക്കും.
കളക്ടറുടെ പരാതിപരിഹാര വേദി ഇന്ന്
01:13 AM Mar 23, 2017 | Deepika.com