കൽപ്പറ്റ: പകർച്ച വ്യാധി നിയന്ത്ര ണത്തിനുളള മുന്നൊരുക്കങ്ങളുടെ ഭാഗമായി ജനങ്ങളിൽ അവബോധം വളർത്തുന്നതിന് ആരോഗ്യസന്ദേശ യാത്ര 2017 നടത്തുമെന്ന് ആരോഗ്യവകുപ്പ് അധികൃതർ അറിയിച്ചു. വർധിച്ചുവരുന്ന പകർച്ച വ്യാധികളായ ഡെങ്കിപ്പനി, മലന്പനി, എലിപ്പനി, കുരങ്ങുപനി, വയറിളക്കം, ടൈഫോയ്ഡ്, മഞ്ഞപ്പിത്തം തുടങ്ങിയ പകർച്ചവ്യാധികളാണ് പൊതുവായി ജില്ലിയിൽ കണ്ടുവരുന്നത്. ഇവയുടെ ആധിക്യം പരമാവധി കുറയ്ക്കുകയും പകർച്ച വ്യാധികൾ കാരണമുണ്ടാകുന്ന മരണങ്ങൾ തടയുകയുമാണ് ആരോഗ്യസന്ദേശ യാത്രയുടെ ലക്ഷ്യം.
ജില്ലയിലെ ഏഴ് തദ്ദേശ സ്വയംഭരണ സ്ഥാപനങ്ങളുടെ പരിധിയിലും ജനപ്രതിനിധികൾ, പൗരപ്രമുഖർ, സന്നദ്ധ സംഘടനകൾ തുടങ്ങിയവയുടെ നേതൃത്വത്തിൽ വിവിധ പരിപാടികൾ അവതരിപ്പിക്കും. ഇതോടൊപ്പം എല്ലാവർക്കും എല്ലാ പ്രായത്തിലും മെച്ചപ്പെട്ട ആരോഗ്യത്തോടെയുള്ള ജീവിതം ലക്ഷ്യംവയ്ക്കുന്ന ആർദ്രം പദ്ധതിയുടെ പ്രചരണവും നടത്തും. പരിപാടയിൽ കോഴിക്കോട് സർവകലാശാലയിലെ എംഎസ്ഡബ്ല്യു വിദ്യാർഥികൾ അവതരിപ്പിക്കുന്ന കലാപരിപാടികൾ ഉണ്ടായിരിക്കും.
ആരോഗ്യസന്ദേശ യാത്രയുടെ ജില്ലാതല ഉദ്ഘാടനം നാളെ രാവിലെ ഒന്പതിന് കൽപ്പറ്റ പുതിയ ബസ്സ്റ്റാൻഡ് പരിസരത്ത് സി.കെ. ശശീന്ദ്രൻ എംഎൽഎ ഉദ്ഘാടനം ചെയ്യും. കൽപ്പറ്റ മുൻസിപ്പൽ ചെയർപേഴ്സണ് ഉമൈബ മൊയ്തീൻ കുട്ടി അധ്യക്ഷത വഹിക്കും. ജില്ലയിലെ നാല് റവന്യൂ ബ്ലോക്കുകളിലായി 13 കേന്ദ്രങ്ങളിൽ ബഹുജന പങ്കാളിത്തത്തോടെ ബോധവത്കരണ നടത്തും.
നാളെ മുതൽ 28 വരെ നടക്കുന്ന ബോധവത്കരണ യാത്ര ആദ്യ ദിനം കൽപ്പറ്റയിൽ നിന്നും ആരംഭിച്ച് വൈത്തിരി, വടുവൻചാൽ എന്നിവിടങ്ങളിലാണ് പര്യടനം. 25ന് പടിഞ്ഞാറത്തറ, കോറോം, വെള്ളമുണ്ട രണ്ടേനാൽ, വള്ളിയൂർക്കാവ് എന്നിവിടങ്ങളിലും 27ന് കോട്ടത്തറ, മീനങ്ങാടി, ചീരാൽ എന്നിവിടങ്ങളിലും 28ന് കേണിച്ചിറ, പുൽപ്പള്ളി, സുൽത്താൻ ബത്തേരി എന്നിവിടങ്ങളിലും പര്യടനം നടത്തും. യാത്രയോടനുബന്ധിച്ച് ജില്ലയിലുടനീളം ബോധവത്കരണ റാലി, സിഡി പ്രദർശനം, നാടൻ കലകൾ, തെരുവ് നാടകം എന്നിവയും നടക്കും. വാർത്താസമ്മേളനത്തിൽ ജില്ലാ മെഡിക്കൽ ഓഫീസർ ഡോ. ആർ. വിവേക് കുമാർ, ഡോ. അഭിലാഷ്, ഡോ. കെ.എസ്. അജയൻ, ഡോ. പി. ദിനീഷ്, മാസ് മീഡിയ ഓഫീസർ ബേബി നാപ്പള്ളി, ഹംസ ഇസ്മാലി എന്നിവർ പങ്കെടുത്തു.
ആരോഗ്യ സന്ദേശ യാത്ര നാളെ മുതൽ
12:44 AM Mar 23, 2017 | Deepika.com