പയ്യാവൂർ: കണ്ണൂർ സോൺ കത്തോലിക്കാ കരിസ്മാറ്റിക് മുന്നേറ്റം മടമ്പം സബ് സോണിന്റെ നേതൃത്വത്തിൽ ഇന്നു വിശ്വാസ പ്രഘോഷണ കുരിശിന്റെ വഴി പ്രാർഥനാ പദയാത്ര നടത്തുന്നു. യമനിൽ ഭീകരുടെ പീഡനമനുഭവിക്കുന്ന ഫാ.ടോം ഉഴുന്നാലിലിനും മറ്റു ശുശ്രൂഷകരോടും അനുഭാവം രേഖപ്പെടുത്തി നടത്തുന്ന കുരിശിന്റെ വഴി രാവിലെ എട്ടിനു മടമ്പം ലൂർദ് മാതാ ഫൊറോന ദേവാലയത്തിൽ വികാരി ഫാ. ജോർജ് കപ്പുകാലായിലിന്റെ ആശീർവാദത്തോടെ ആരംഭിക്കും.
അലക്സ് നഗർ സെന്റ് ജോസഫ്സ് ദേവാലയത്തിൽ ഫാ. സ്റ്റീഫൻ കുളക്കാട്ട്കുടിയിൽ, പയ്യാവൂർ സെന്റ് ആൻസ് ടൗൺ ദേവാലയത്തിൽ ഫാ. ബാബു പാറത്തോട്ടുംകര, കണ്ടകശേരി സെന്റ് സെബാസ്റ്റ്യൻസ് ദേവാലയത്തിൽ ഫാ. സജി പുത്തൻപുരയ്ക്കൽ എന്നിവർ വചനസന്ദേശം നൽകും.
ഉച്ചകഴിഞ്ഞു മൂന്നോടെ ചമതച്ചാലിൽ എത്തിച്ചേരുന്ന കുരിശിന്റെ വഴിപദയാത്ര വിശുദ്ധ എസ്തഫാനോസ് ദേവാലയത്തിൽ ഫാ. സുനിൽ പെരുമാനൂരിന്റെ മുഖ്യകാർമികത്വത്തിൽ നടക്കുന്ന വിശുദ്ധ കുർബാനയോടെ സമാപിക്കും.
മടമ്പം സബ് സോൺ ആനിമേറ്റർ ഫാ. സ്റ്റീഫൻ കുളക്കാട്ട് കുടിയിൽ, സബ് സോൺ കോ-ഓർഡിനേറ്റർ സൈമൺ വട്ടുകുളം, സെക്രട്ടറി സജി നടക്കുഴ, സോണൽ കോ-ഓർഡിനേറ്റർ സജി കാക്കനാട്ട് എന്നിവരുടെ നേതൃത്വത്തിലാണു കുരിശിന്റെ വഴി പദയാത്ര നടത്തുന്നത്.
ഫാ. ടോം ഉഴുന്നാലിലിന്റെ മോചനം: മടന്പത്ത് കുരിശിന്റെ വഴി ഇന്ന്
01:59 AM Mar 22, 2017 | Deepika.com