ഉഴവൂർ: കെ.ആർ. നാരായണൻ സ്പെഷ്യാലിറ്റി ആശുപത്രിയുടെ വിവിധ വികസനപ്രവർത്തനങ്ങൾക്കായി എംഎൽഎ ഫണ്ടിൽ നിന്ന് അനുവദിച്ച അരക്കോടി രൂപയുടെ പദ്ധതിക്ക് സർക്കാർ ഭരണാനുമതി നൽകിയതായി മോൻസ് ജോസഫ് എംഎൽഎ അറിയിച്ചു.
ആശുപത്രിയുടെ അടിയന്തര ആവശ്യങ്ങൾ നിറവേറ്റാൻ സർക്കാർ തലത്തിൽ ഫണ്ടിന് കാലതാമസം നേരിടുന്ന സാഹചര്യത്തിലാണ് എംഎൽഎ ഫണ്ടിൽ നിന്ന് തുക അനുവദിച്ചത്. തദ്ദേശ സ്വയംഭരണ വകുപ്പിന്റെ കീഴിൽ ഉഴവൂർ ബ്ലോക്ക് പഞ്ചായത്തിന്റെ മേൽനോട്ടത്തിലാണ് പുതിയ ഫണ്ട് വിനിയോഗിക്കുക. ടെൻഡർ നടപടികൾ ബ്ലോക്ക് എൻജിനിയറിംഗ് വിഭാഗത്തിന്റെ നേതൃത്വത്തിൽ ആരംഭിച്ചു.
പൊതുമരാമത്ത് വകുപ്പ് നിർമാണം പൂർത്തീകരിച്ച ആശുപത്രി കെട്ടിട സമുച്ചയത്തിന്റെ ഫയർ ആൻഡ് സേഫ്റ്റി അനുമതി ലഭിക്കുന്നതിൽ നേരിട്ട സാങ്കേതിക പ്രശ്നങ്ങൾ വകുപ്പ് അധികൃതരുമായി ചർച്ച നടത്തി പരിഹാരം കണ്ടെത്തിയതായും മോൻസ് ജോസഫ് എംഎൽഎ അറിയിച്ചു. ഫയർ ആൻഡ് റെസ്ക്യൂ ഡയറക്ടറേറ്റിൽ നിന്ന് ചൂണ്ടിക്കാണിച്ച ആവശ്യങ്ങൾ പരിശോധിച്ച് തൃപ്തികരമായ പരിഹാരം ഉണ്ടാക്കിയതായും എംഎൽഎ അറിയിച്ചു. ഇതിന്റെ അടിസ്ഥാനത്തിൽ ആശുപത്രിയുടെ പുതിയ കെട്ടിട സമുച്ചയത്തിനുള്ള എൻഒസി ലഭിക്കുന്നതിനുള്ള അന്തിമ ഫയലിന്മേൽ ഉടനെ ഉത്തരവ് ലഭിക്കുമെന്നും എംഎൽഎ അറിയിച്ചു.
ഫയർ ആൻഡ് സേഫ്റ്റി സർട്ടിഫിക്കറ്റ് ലഭിച്ചാൽ മാത്രമേ ഗ്രാമപഞ്ചായത്തിന് കെട്ടിട നന്പരിടാൻ കഴിയൂവെന്ന സാഹചര്യം ഇതോടെ പരിഹരിക്കപ്പെടും. കെട്ടിട നന്പർ ലഭിച്ചാലുടനെ വൈദ്യുതി കണക്ഷൻ അപേക്ഷിക്കാനുള്ള ഫണ്ട് ഉഴവൂർ ബ്ലോക്ക് പഞ്ചായത്ത് നീക്കിവച്ചിട്ടുണ്ട്.
ആശുപത്രിയിൽ വിവിധ സ്പെഷ്യാലിറ്റി വിഭാഗങ്ങൾ പ്രവർത്തനം ആരംഭിക്കുന്നതിന് ആവശ്യമായ തസ്തികകളുടെ ഫയലിന്മേൽ സർക്കാർ എത്രയും വേഗം അനുമതി നൽകണമെന്ന് മോൻസ് ജോസഫ് എംഎൽഎ മന്ത്രി കെ.കെ.ഷൈലജയ്ക്ക് സമർപ്പിച്ച നിവേദനത്തിൽ ആവശ്യപ്പെട്ടു.
ഉഴവൂർ കെ.ആർ. നാരായണൻ ആശുപത്രി: അരക്കോടിയുടെ എംഎൽഎ ഫണ്ടിന് അനുമതി
10:07 PM Mar 21, 2017 | Deepika.com