ശാസ്ത്രീയ മാലിന്യ സംസ്കരണത്തിൽ പരിശീലനം നൽകി
12:53 AM Feb 15, 2017 | Deepika.com
കൽപ്പറ്റ: വിനോദസഞ്ചാര വകുപ്പ് സംസ്ഥാനത്തെ 79 ടൂറിസ്റ്റ് കേന്ദ്രങ്ങളിൽ നടപ്പാക്കുന്ന ഗ്രീൻ കാർപ്പറ്റ് പദ്ധതിയുടെ ഭാഗമായി ശാസ്ത്രീയ മാലിന്യ സംസ്കരണം, അടിയന്തരഘട്ടങ്ങളിലെ പ്രഥമശുശൂഷ എന്നീ വിഷയങ്ങളിൽ ഡിടിപിസി ജീവനക്കാർക്കും ടൂറിസം ക്ലബ് പ്രവർത്തകക്കും പരിശീലനം നൽകി. ഡിടിപിസി ഹാളിൽ ജില്ലാ കളക്ടർ ഡോ. ബി.എസ്. തിരുമേനി ഉദ്ഘാടനം ചെയ്തു. ടൂറിസം ഡപ്യൂട്ടി ഡയറക്ടർ എം. ഹുസൈൻ, അധ്യക്ഷത വഹിച്ചു, ടൂറിസം ഇൻഫർമേഷൻ ഓഫീസർ കെ.അജിത്കുമാർ, ജില്ലാ ഇൻഫർമേഷൻ ഓഫീസർ കെ.പി.അബ്ദുൽ ഖാദർ, ഫിനാൻസ് ഓഫീസർ കെ.പി. മനോജൻ, ഡിടിപിസി മാനേജർ സി.ആർ. ഹരികുമാർ, ശുചിത്വമിഷൻ പ്രോഗ്രാം ഓഫീസർ കെ. അനൂപ്, വിംസ് കോ-ഓർഡിനേറ്റർ കെ. ഉണ്ണികൃഷ്ണൻ, ഡോ.എം. ശിവദാസൻ എന്നിവർ പ്രസംഗിച്ചു. ജില്ലയിൽ പൂക്കോട് തടാകം, കർലാട് തടാകം, കാന്തൻപാറ, എടക്കൽ ഗുഹ, കുറുവാദ്വീപ്, പ്രിയദർശിനി ടീ എൻവിറോണ്സ് എന്നിവിടങ്ങളിലാണ് ഗ്രീൻ കാർപ്പറ്റ് പദ്ധതി നടപ്പാക്കുന്നത്. ആദ്യഘട്ടത്തിൽ കുറുവാ ദ്വീപിൽ 42-ഉം പ്രിയദർശിനിയിൽ 50-ഉം കർലാട് തടാകത്തിൽ 102-ഉം കാന്തൻപാറയിൽ 25-ഉം ലക്ഷം രൂപയുടെ പ്രവൃത്തികളാണ് നിർമിതി കേന്ദ്രം മുഖേന നടത്തുന്നത്. പൂക്കോട്, കർലാട് തടാകങ്ങളിൽ എൻഎസ്എസ് ടെക്നിക്കൽ സെല്ലിന്റെ സഹകരണത്തോടെയും കാന്തൻപാറയിൽ ഹരിതകേരളം പദ്ധതിയുടെ ഭാഗമായും മാസ് സ്ക്രീനിംഗ് നടത്തി പദ്ധതി പ്രകാരം മാലിന്യ സംസ്കരണം, ടോയ്ലെറ്റ് നവീകരണം, പാതയോര ലൈറ്റിംഗ്, പാത്വേ, സൂചനാ ബോർഡുകൾ സ്ഥാപിക്കൽ, കുടിവെള്ള സൗകര്യമേർപ്പെടുത്തൽ, പരിസ്ഥിതി സംരക്ഷണ പ്രവർത്തനങ്ങൾ, ഇൻഫർമേഷൻ കൗണ്ടർ, പരാതിപരിഹാര സെൽ എന്നിവയും ആസൂത്രണം ചെയ്തിട്ടുണ്ട്.