പടുപ്പ്: പടുപ്പ് സെന്റ് ജോർജ് ദേവാലയ സുവർണജൂബിലിയാഘോഷങ്ങളുടെ ഭാഗമായി ഒരുമ 2017 എന്ന പേരിൽ സംഘടിപ്പിച്ച സ്നേഹസന്ദേശ യാത്രയും സാംസ്കാരിക സമ്മേളനവും ശ്രദ്ധേയമായി.
നൂറുകണക്കിന് ആളുകൾ പങ്കെടുത്ത ചടങ്ങ് മതമൈത്രിയുടെ വിളംബരംകൂടിയായി. വൈകുന്നേരം 4.30ന് ശ്രീശാസ്താ നഗറിൽനിന്ന് ആരംഭിച്ച സ്നേഹസന്ദേശ യാത്ര പടുപ്പ് ടൗണിലൂടെ ദേവാലയ അങ്കണത്തിൽ സമാപിച്ചു.
യാത്രയിൽ തലശേരി ആർച്ച്ബിഷപ് മാർ ജോർജ് ഞരളക്കാട്ട്, ശിവഗിരി മഠത്തിലെ സ്വാമി പ്രേമാനന്ദ, കാഞ്ഞങ്ങാട് സംയുക്ത ജമാഅത്ത് സെക്രട്ടറി ബഷീർ വെള്ളിക്കോത്ത് എന്നിവരെ തുറന്ന വാഹനത്തിൽ ആനയിച്ചു. തുടർന്നു നടന്ന സാംസ്കാരികസമ്മേളനം ഉദുമ എംഎൽഎ കെ.കുഞ്ഞിരാമൻ ഉദ്ഘാടനം ചെയ്തു.
ആർച്ച്ബിഷപ് മാർ ജോർജ് ഞരളക്കാട്ട് അധ്യക്ഷത വഹിച്ചു. സ്വാമി പ്രേമാനന്ദ, ബഷീർ വെള്ളിക്കോത്ത്, മോണ്. ജോർജ് എളൂക്കുന്നേൽ എന്നിവർ സ്നേഹസന്ദേശം നൽകി.
ലിസി തോമസ്, ശുഭ ലോഹിതാക്ഷൻ, ഫാ.തോമസ് പൈന്പിള്ളിൽ, ആനന്ദറൈ, അബു ഫിദാ റഹ്മാനി കുടക്, സിസ്റ്റർ ജെയിൻ ജോസ്, സിസ്റ്റർ മരിയറ്റ്, ബേബി മഞ്ഞക്കുന്നേൽ തുടങ്ങിയവർ ആശംസാപ്രസംഗം നടത്തി.
ആദ്യകാല അധ്യാപകൻ സണ്ണയ്യ ഗൗഡ, ജനകീയ ഡോക്ടർ ഡോ.ജയറാം, മികച്ച വില്ലേജ് ഓഫീസർക്കുള്ള സംസ്ഥാന അവാർഡ് ജേതാവ് സുരേഷ് ബാബു, പ്രദേശത്തെ മുതിർന്ന പൗരന്മാരായ വർഗീസ് മടത്തുംകുടിയിൽ, അബ്ദുൾ റഹിമാൻ ബേഡകം, പ്രദേശത്തെ ആദ്യകാല വ്യാപാരി പി.ബാലൻ എന്നിവരെ ചടങ്ങിൽ ആദരിച്ചു.
സംഘാടകസമിതി ചെയർമാൻ ഫാ.തോമസ് ആമക്കാട്ട് സ്വാഗതവും ജനറൽ കണ്വീനർ അജിത്കുമാർ ആസാദ് നന്ദിയും പറഞ്ഞു.
മതമൈത്രീ സന്ദേശവുമായി പടുപ്പിൽ ‘ഒരുമ’
11:10 PM Feb 12, 2017 | Deepika.com