കൽപ്പറ്റ: ഹരിതകേരള എക്സ്പ്രസ് ജില്ലയിൽ പര്യടനം തുടങ്ങി. നവകേരള മിഷനിലുൾപ്പെട്ട പദ്ധതിയുടെ ഭാഗമായി ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പാണ് വയനാടിന്റെ പച്ചപ്പുകൾ വീണ്ടെടുക്കുക എന്ന ലക്ഷ്യത്തോടെ വിവിധ കേന്ദ്രങ്ങളിൽ പ്രചാരണവുമായി എത്തുന്നത്.
ഒരിക്കൽ പ്രകൃതി സന്തുലിതമായ കാലാവസ്ഥയായിരുന്നു ഈ നാട്ടിലുണ്ടായിരുന്നത്. അതിരു കടന്ന ഖനനവും ചൂഷണവും നാടിനെ തകർത്തു. വയലുകൾ വാഴകൃഷിക്ക് വഴിമാറിയതോടെ കാലാവസ്ഥയും മാറി. കുടിവെള്ളത്തിനുവേണ്ടി അലയുന്ന നാട്ടിൽ മാറ്റത്തിനു വേണ്ടി ജനങ്ങൾ ഉണരണം. ഈ സന്ദേശം പങ്കുവയ്ക്കുന്ന ബാലുശേരി മനോരഞ്ജൻ ആർട്സിന്റെ വിൽക്കലാമേള പ്രാചാരണ വാഹനത്തോടൊപ്പം സഞ്ചരിക്കുന്നുണ്ട്. രവി മനോരഞ്ജൻ, ഭാസ്കരൻ ഇയ്യാട്ട്, രാജൻ വടക്കേക്കര, രാമചന്ദ്രൻ സാരംഗി, ശ്രീധരൻ വട്ടോളി, കെ. ശെൽവരാജ്, ഒ.പി. വിനോദ് കുമാർ എന്നീ കകാലകാരൻമാരണ് വിൽക്കലാമേള അവതരിപ്പിക്കുന്നത്. കൽപ്പറ്റ സിവിൽ സ്റ്റേഷൻ പരിസരത്ത് സി.കെ. ശശീന്ദ്രൻ എംഎൽഎ പ്രചാരണ വാഹനം ഫ്ളാഗ് ഓഫ് ചെയ്തു. ജില്ലാ പഞ്ചായത്ത് പ്രസിഡന്റ് ടി. ഉഷാകുമാരി അധ്യക്ഷത വഹിച്ചു.
ജില്ലാ പഞ്ചായത്ത് വൈസ് പ്രസിഡന്റ് പി.കെ. അസ്മത്ത്, ജില്ലാ ഇൻഫർമേഷൻ ഓഫീസർ കെ.പി. അബ്ദുൾ ഖാദർ, ഹുസൂർ ശിരസ്തദാർ മേഴ്സി എന്നിവർ പ്രസംഗിച്ചു. മീനങ്ങാടി, സുൽത്താൻ ബത്തേരി, പനമരം, മാനന്തവാടി എന്നിവിടങ്ങളിൽ ഇന്നലെ പ്രചാരണം നടത്തി. വ്യാഴാഴ്ച രാവിലെ 10.30 ന് കാട്ടിക്കുളം, 11.30 ന് തലപ്പുഴ, ഒന്നിന് വെള്ളമുണ്ട, മൂന്നിന് പടിഞ്ഞാറത്തറ, നാലിന് കൽപ്പറ്റ 5.30 ന് വൈത്തിരി എന്നിവടങ്ങളിൽ പര്യടനം നടത്തും.
ഹരിത കേരള എക്സ്പ്രസ് പര്യടനം തുടങ്ങി
01:00 AM Feb 09, 2017 | Deepika.com