ആലുവ: സംസ്ഥാനത്തെ ഡിപ്ലോമക്കാരായ എൻജനീയറിംഗ് ജീവനക്കാരുടെ സ്ഥാനക്കയറ്റം തടസപ്പെടുന്ന സാഹചര്യം ഒഴിവാക്കണമെന്ന് കേരള എൻജിനീയറിംഗ് സ്റ്റാഫ് അസോസിയേഷൻ (കെഇഎസ്എ) മധ്യമേഖല കണ്വൻഷൻ ആവശ്യപ്പെട്ടു. സൂപ്പർ സീഡിംഗ് ക്ലോസ് എന്ന സംവിധാനത്തിന്റെ മറവിൽ ഡിപ്ലോമക്കാരായ എൻജിനീയർമാരുടെ സ്ഥാനക്കയറ്റം തടയപ്പെടുന്നതും ഡിഗ്രിക്കാരായ എൻജിനീയർമാർ ഡിപ്ലോമക്കാരെ മറികടന്ന് സ്ഥാനക്കയറ്റം തട്ടിയെടുക്കുന്നതും തടയപ്പെടേണ്ടതാണ്.
സ്ഥാനക്കയറ്റം നടക്കാത്തതിനാൽ ഒഴിവുകൾ വരുന്ന തസ്തികകൾ നികത്താനാകുന്നില്ല. പൊട്ടിപൊളിഞ്ഞ റോഡുകൾ നന്നാക്കാനോ കെട്ടിടങ്ങൾ പുതുക്കി പണിയാനോ വേണ്ടത്ര ജീവനക്കാരെ നിയമിക്കാത്തത് വികസന പ്രവർത്തനങ്ങളെ സാരമായി ബാധിക്കുന്നതായും കണ്വൻഷൻ അഭിപ്രായപ്പെട്ടു.
ആലുവ അന്നപൂർണ ഹാളിൽ നടന്ന കണ്വൻഷൻ സംസ്ഥാന പ്രസിഡന്റ് എച്ച്. സിദ്ദിഖ് ഉദ്ഘാടനം ചെയ്തു. വൈസ് പ്രസിഡന്റ് പി. രാജീവ് അധ്യക്ഷത വഹിച്ചു. സംസ്ഥാന സെക്രട്ടേറിയറ്റംഗം കെ.എം. ഫിലിപ്പോസ്, സംസ്ഥാന കമ്മിറ്റിംഗം കെ.സി. ജോർജ്, ജില്ലാ പ്രസിഡന്റ് കെ.എൻ. സുർജിത് എന്നിവർ പ്രസംഗിച്ചു. ജില്ലാ സെക്രട്ടറി നവാസ് യൂസഫ് സ്വാഗതവും ജോ. സെക്രട്ടറി പി.എ. ലാലൻ നന്ദിയും പറഞ്ഞു.
ജീവനക്കാരുടെ സ്ഥാനക്കയറ്റം തടസപ്പെടുന്ന സാഹചര്യം ഒഴിവാക്കണം
01:33 AM Feb 08, 2017 | Deepika.com