കൽപ്പറ്റ: ബ്രഹ്മഗിരി ഡെവലപ്മെന്റ് സൊസൈറ്റിക്ക് ബജറ്റിൽ വകയിരുത്തിയ 10 കോടി രൂപയ്ക്ക് ഭരണാനുമതി ലഭിച്ചു. മൂന്നിന് തിരുവനന്തപുരത്ത് ചേർന്ന സ്റ്റേറ്റ് വർക്കിംഗ് ഗ്രൂപ്പാണ് അംഗീകാരം നൽകിയത്.
ഇത് പ്രകാരം മൂന്നു കോടി രൂപ പ്രവർത്തന മൂലധനമായും രണ്ട് കോടി രൂപ ഉരു വളർത്തൽ പദ്ധതിയ്ക്കും, അഞ്ച് കോടി രൂപ മാലിന്യ സംസ്ക്കരണം, അടിസ്ഥാന സൗകര്യ വികസനം പദ്ധതിക്കുമാണ്.
രണ്ട് കോടി രൂപയുടെ ഉരുവളർത്തൽ പദ്ധതിയിലൂടെ വയനാട്ടിലേയും സമീപ ജില്ലകളിലേയും 2000 കുടുംബങ്ങൾക്ക് തൊഴിലും വരുമാനവും ലഭ്യമാക്കാൻ സാധിക്കും. സർക്കാർ വകുപ്പുകളുടെ സഹായത്തോടെ നടപ്പാക്കുന്ന പദ്ധതിയിൽ വെറ്ററിനറി ഡോക്ടർമാർ, ലൈവ് സ്റ്റോക്ക് ഇൻസ്പെക്ടർമാർ എന്നിവരുടെ സേവനം, ശാസ്ത്രീയ വളർത്തൽ രീതികളെക്കുറിച്ചുള്ള പരിശീലനം എന്നിവയും ലഭ്യമാക്കാൻ സാധിക്കുന്നതാണ്.
മൂന്നുകോടി രൂപയുടെ പ്രവർത്തന മൂലധനം എത്രയും വേഗം ലഭ്യമാക്കുന്നതാണെന്ന് മൃഗസരംക്ഷണ വകുപ്പ് ഡയറക്ടർ ജോർജുകുട്ടി ജേക്കബ് അറിയിച്ചു. ഉരു വളർത്തൽ പദ്ധതിയുടെ ഉദ്ഘാടനം ഫെബ്രുവരിയിൽ നടക്കും.
ബ്രഹ്മഗിരി പദ്ധതിക്ക് 10 കോടിയുടെ ഭരണാനുമതി
12:52 AM Jan 07, 2017 | Deepika.com