റിയാദ്: പ്രവാസി ഫ്രണ്ട്സ് ഓഫ് ഇന്ത്യ ആറാമത് വാർഷികം ഫ്രണ്ട്സോത്സവം ജനപങ്കാളിത്തം കൊണ്ട് ശ്രദ്ധേയമായി. റിയാദ് എക്സിറ്റ് 18 ലെ വലീദ് ഓഡിറ്റോറിയത്തിലേക്കൊഴുകിയെത്തിയത് ആയിരക്കണക്കിനാളുകളായിരുന്നു. ഫ്രണ്ട്സോത്സവം സീസൺ 6 ൽ മുഖ്യാതിയായിരുന്ന ഫിലിപ്പ് മമ്പാടിന്റെ പ്രഭാഷണം കേട്ട് ഏറെ വൈകിയും ഓഡിറ്റോറിയം നിറഞ്ഞ് കവിഞ്ഞു. പ്രവാസ ലോകത്തെ പരസ്പര സ്നേഹത്തിന്റെയും ഐക്യത്തിന്റെയും യാഥാർഥ്യം തിരിച്ചറിഞ്ഞ ഒരു സന്ദർശനമാണിതെന്നും, പുതു തലമുറ ലക്ഷ്യബോധമില്ലാതെ ലഹരിക്ക് പിറകിൽ ഓടുമ്പോൾ ഒരു ബോധവൽകരണം മാത്രമല്ല വേണ്ടത് മറിച്ച് ബോധ്യപ്പെടുത്തലാണ് അത്യാവശ്യമെന്നും അദ്ദേഹം തൻ്റെ പ്രസംഗത്തിൽ പറഞ്ഞു.
ലഹരിക്കെതിരെ കേരളത്തിൽ നടത്തിവരുന്ന വാക്കും വരയും എന്ന ക്യാമ്പയിനിന്റെ ഭാഗമായി നാടത്തുന്ന തത്സമയ കലാരൂപം ചിത്രകാരൻ മഹേഷ് ചിത്രവർണം വേദിയിൽ അവതരിപ്പിച്ചു. സാമുഹിക പ്രവർത്തകൻ മുസ്തഫ മഞ്ചേരി ചടങ്ങിൽ സംസാരിച്ചു.
തുടർന്ന് പ്രശസ്ത മാപ്പിളപ്പാട്ട് ഗായകൻ താജുദ്ദീൻ വടകര, പതിനാലാം രാവ് ഫെയിം സഹജ മൻസൂർ, ഗായകൻ ആസിഫ് കാപ്പാട് തുടങ്ങിയവരുടെ നേതൃത്വത്തിൽ ഗാനസന്ധ്യയും അരങ്ങേറി. റിയാദിലെ കലാകാരൻമാർ ഒരുക്കിയ കലാവിരുന്നും ഫ്രണ്ട്സോത്സവത്തിന്ന് മാറ്റ് കൂട്ടി.
ഫ്രണ്ട് സോത്സവം സാംസ്കാരിക സമ്മേളനം ശിഹാബ് കോട്ടുക്കാട് ഉദ്ഘാടനം ചെയ്തു.
പ്രവാസി ഫ്രണ്ട്സ് ഓഫ് ഇന്ത്യ പ്രസിഡൻ്റ് സലിം വാലില്ലാപ്പുഴയുടെ അധ്യക്ഷതയിൽ നടന്ന സമ്മേളനത്തിൽ റിയാദ് മീഡിയ ഫോറം പ്രസിഡൻ്റ് ഷംനാദ് കരുനാഗപ്പള്ളി, മാധ്യമ പ്രവർത്തകൻ സുലൈമാൻ വിഴിഞ്ഞം, ഇന്ത്യൻ സ്കൂൾ ഹെഡ്മിസ്ട്രസ് മൈമൂന ടീച്ചർ, സൗദ് അൽ ഖഹ്ത്താനി, സാമുഹിക പ്രവർത്തകരായ സലിം ആർത്തിയിൽ, ഗഫൂർ കൊയിലാണ്ടി, ഇബ്റാഹിം സുബ്ഹാൻ, നസീർ തൈക്കണ്ടി തുടങ്ങിയവർ സംസാരിച്ചു. പ്രവാസി ഫ്രണ്ട്സ് ഓഫ് ഇന്ത്യ ജനറൽ സെക്രട്ടറി സലാം തിരുവമ്പാടി സ്വാഗതവും പ്രോഗ്രാം കോർഡിനേറ്റർ റഷീദ് മൂവാറ്റുപുഴ നന്ദിയും പറഞ്ഞു.
ഫ്രണ്ട്സോത്സവം സീസൺ 6 ജനപങ്കാളിത്തം കൊണ്ട് ശ്രദ്ധേയമായി
05:51 AM Mar 22, 2023 | Deepika.com