അബൂദാബി : യു എ ഇയുടെ അമ്പത്തി ഒന്നാമത് ദേശീയ ദിനാഘോഷങ്ങളുടെ ഭാഗമായി അബൂദാബി ഇന്ത്യന് ഇസ്ലാമിക് സെന്റര് ഒരുക്കുന്ന ആഘോഷ പരിപാടികള് ഡിസംബര് നാലിന് ഞായറാഴ്ച വൈകീട്ട് ആറിനു ഇന്ത്യന് ഇസ്ലാമിക് സെന്ററില് നടക്കും.
മാനവിക മൂല്യങ്ങളിലൂന്നി സഹവര്തിത്വത്തിന്റെയും സഹിഷ്ണുതയുടെയും സന്ദേശം ലോകത്തിന് പകര്ന്നു നല്കുന്ന മഹത്തായ പാരമ്പര്യമാണ് യു എ ഇ യുടേതെന്നും , പക്ഷഭേദങ്ങളില്ലാതെ രാജ്യത്തിനകത്തും പുറത്തും ജനക്ഷേമ പ്രവര്ത്തനങ്ങള്ക്ക് നേതൃത്വം നല്കുകയുംചെയ്യുന്ന യു എ ഇയുടെ ദേശീയദിനം ഓരോ പ്രവാസിയുടെയും സ്വന്തം ആഘോഷമാക്കി മാറ്റുക എന്ന ലക്ഷ്യത്തോടെയാണ് ആഘോഷപരിപാടികൾ സംഘടിപ്പിക്കുന്നതെന്ന് ഇസ്ലാമിക് സെന്റര് ഭാരവാഹികള് വാർത്താസമ്മേളനത്തില് അഭിപ്രായപ്പെട്ടു.
ലുലു ഗ്രൂപ്പ് ഇന്റര്നാഷണല് ചെയര്മാനും മാനേജിംഗ് ഡയറക്ടറുമായ പത്മശ്രീ എം എ യൂസുഫലിയാണ് ദേശീയ ദിനാഘോഷ പരിപാടിയിലെ വിശിഷ്ടാതിഥി.
യു എ ഇ പ്രസിഡന്റിന്റെ മതകാര്യ ഉപദേഷ്ടാവ് സയ്യിദ് അലി അല് ഹാഷിമി ആഘോഷ പരിപാടികള് ഉദ്ഘാടനം ചെയ്യും. അബൂദാബി ഇന്ത്യന് എംബസി പ്രതിനിധികള് ഉള്പ്പെടെ സ്വദേശികളും ഇന്ത്യക്കാരുമായ പ്രമുഖര് പങ്കെടുക്കും.
യു എ ഇ യുടെ ചരിത്രവും പാരമ്പര്യവും, ഇന്ത്യയും യു എ ഇ യും തമ്മില് നൂറ്റാണ്ടുകളായുള്ള ഊഷ്മള ബന്ധവും വിളിച്ചോതുന്ന കലാപരിപാടികളും പ്രമുഖ ഗായകന് കണ്ണൂര് ഷരീഫിന്റെ നേതൃത്വത്തിലുള്ള ഗാനവിരുന്നും ആഘോഷങ്ങളുടെ ഭാഗമായുണ്ടാവും.
വാർത്താസമ്മേളനത്തില് ഇസ്ലാമിക് സെന്റര് ജനറല് സെക്രട്ടറി ടി കെ അബ്ദുല് സലാം, കെ എം സി സി ആക്ടിങ് പ്രസിടണ്ട് അബ്ദുൽ അസീസ് കാളിയാടാൻ, ജനറൽ സെക്രട്ടറി അഡ്വക്കേറ്റ് മുഹമ്മദ് കുഞ്ഞി, ഇസ്ലാമിക് സെന്റർ ഭാരവാഹികളായ അഷ്റഫ് നജാത്ത്,മുസ്തഫ വാഫി, സലീം നാട്ടിക, ഹനീഫ പടിഞ്ഞാര്മൂല, അബ്ദുല് അസീസ് പീ എം തുടങ്ങിയവര് പങ്കെടുത്തു.
അബുദാബി ഇന്ത്യൻ ഇസ്ലാമിക് സെന്റര് യു എ ഇ ദേശീയ ദിനാഘോഷം ഒരുക്കുന്നു
02:49 PM Dec 02, 2022 | Deepika.com