കറുകച്ചാല്: സ്നേഹമോളുടെ ജീവന് രക്ഷിക്കാന് കറുകച്ചാലിലെ സ്നേഹകരങ്ങള് കൈ കോര്ക്കുന്നു. ഇരുവൃക്കകളും തകരാറിലായി വൃക്ക മാറ്റിവയ്ക്കല് ശസ്ത്രക്രിയയ്ക്കു വിധേയയാകുന്ന കറുകച്ചാല് പഞ്ചായത്ത് ആറാം വാര്ഡ് ആഞ്ഞിലിതോപ്പില് സതീശന്റെ മകള് സ്നേഹമോളു (19)ടെ ജീവന് രക്ഷിക്കാനാണ് നാളെ കറുകച്ചാല് നിവാസികള് കൈകോര്ക്കുന്നത്.
കറുകച്ചാല് പഞ്ചായത്തും ചങ്ങനാശേരി പ്രത്യാശയും ചേര്ന്ന് ഞായറാഴ്ച അഞ്ചുമണിക്കൂര് കൊണ്ട് പത്തുലക്ഷം രൂപ സമാഹരിക്കാനാണ് ലക്ഷ്യമിടുന്നത്. ഇരുവൃക്കകളും തകരാറിലായതിനെത്തുടര്ന്ന് കഴിഞ്ഞ ഒരു വര്ഷത്തോളമായി ചികിത്സയിലായിരുന്നു. സ്നേഹമോളുടെ ജീവന് രക്ഷിക്കുന്നതിനായി വൃക്ക മാറ്റിവയ്ക്കേണ്ടത് അത്യാവശ്യമാണ്. അച്ഛന് സതീശനാണ് മകള്ക്കു വൃക്ക നല്കുന്നത്. ശസ്ത്രക്രിയയ്ക്കും മറ്റു ചെലവുകള്ക്കുമായി പത്തുലക്ഷം രൂപയോളം വേണം. എന്നാല്, ഇത്രയും വലിയ തുക നിര്ധന കുടുംബത്തിന് കണ്ടെത്താന് കഴിയില്ലെന്ന് തിരിച്ചറിഞ്ഞതോടെ കറുകച്ചാല് ഗ്രാമപഞ്ചായത്തും ചങ്ങനാശേരി പ്രത്യാശയും ചേര്ന്ന് സഹായനിധി രൂപീകരിക്കുകയായിരുന്നു.
ഇന്ന് കറുകച്ചാല് ടൗണിലെ വ്യാപാര സ്ഥാപനങ്ങളില്നിന്നും നാളെ അഞ്ച്, ആറ്, ഏഴ്, 12, 13, 14 എന്നീ വാര്ഡുകളില്നിന്നും ജീവന്രക്ഷാ സമിതിയുടെ നേതൃത്വത്തില് ധനസമാഹരണം നടത്തും. ഇതിനായി ജീവന് രക്ഷാസമിതിയംഗങ്ങള് രാവിലെ ഒന്പതുമുതല് രണ്ടുവരെ വീടുകളിലെത്തും. സ്നേഹമോളുടെ പേരില് കറുകച്ചാല് അര്ബന് കോ-ഓപറേറ്റീവ് സൊസൈറ്റിയില് അക്കൗണ്ടും തുറന്നിട്ടുണ്ട്.
സ്നേഹമോളുടെ രക്ഷയ്ക്കായി നാട് കൈകോര്ക്കുന്നു
12:29 AM Mar 25, 2023 | Deepika.com