കോലഞ്ചേരി: പൂതൃക്ക പഞ്ചായത്തിലെ മീമ്പാറയിൽ പഞ്ചായത്തു വക കെട്ടിടത്തിൽ സൂക്ഷിച്ചിരുന്ന പ്ലാസ്റ്റിക് മാലിന്യത്തിനു തീ പിടിച്ചു. ഇന്നലെ പുലർച്ചെ ഒന്നോടെയായിരുന്നു സംഭവം. മീമ്പാറ കിഴക്കേ കവലയിലെ മൂന്നുനിലകളുള്ള കൂറ്റൻ കെട്ടിടത്തിൽ പഞ്ചായത്തിലെ ഹരിത കർമസേന ശേഖരിച്ചുവച്ചിരുന്ന പ്ലാസ്റ്റിക് മാലിന്യത്തിനാണ് തീപിടിച്ചത്.
താഴത്തെ നിലയിൽ ഏഴു മുറികളിലും പുറത്തുമായി ചാക്കുകളിൽ നിറച്ചുവച്ചിരുന്ന പ്ലാസ്റ്റിക് മാലിന്യങ്ങളിൽ തീ ആളിക്കത്തി. 3,000 ചതുരശ്ര അടിയോളം സ്ഥലത്താണ് പ്ലാസ്റ്റിക് മാലിന്യങ്ങൾ ശേഖരിച്ചുവച്ചിരുന്നത്.
കെട്ടിടത്തിൽ തീ ഉയരുന്നതുകണ്ട സമീപവാസികളാണ് അഗ്നിരക്ഷാസേനയെ വിവരമറിയിച്ചത്. തുടർന്ന് പട്ടിമറ്റം, മുളന്തുരുത്തി എന്നിവിടങ്ങളിൽനിന്ന് സേനയുടെ മൂന്നു യൂണിറ്റുകളെത്തി പുലർച്ചെ 3.30ഓടെ തീയണയ്ക്കുകയായിരുന്നു.
പുത്തൻകുരിശ് പോലീസ് സംഘവും കെഎസ്ഇബി ഉദ്യോഗസ്ഥരും സ്ഥലത്തെത്തി പ്രവർത്തനങ്ങളിൽ പങ്കുകൊണ്ടു. തീ പിടിച്ചതിന്റെ യഥാർഥ കാരണങ്ങൾ വ്യക്തമായിട്ടില്ലെങ്കിലും സമീപത്തെ ബാങ്കിന്റെ സിസി ടിവിയിൽ സംഭവ സമയം ഒരാൾ ഓടുന്നതു കണ്ടെത്തിയതായി വിവരമുണ്ട്. പുത്തൻകുരിശ് പോലീസ് സമീപത്തെ സിസി ടിവി ദൃശ്യങ്ങൾ പരിശോധിക്കു ന്നുണ്ട്.
യാതൊരു സുരക്ഷാ മാനദണ്ഡങ്ങളും പാലിക്കാതെയാണ് ഈ കെട്ടിടത്തിനകത്തും പുറത്തുമായി നൂറു കണക്കിനു ചാക്കുകളിൽ പ്ലാസ്റ്റിക് മാലിന്യം ശേഖരിച്ചിരുന്നത്. മാർച്ച് രണ്ടിന് ഇതിനെക്കുറിച്ച് ദീപിക വാർത്ത നൽകിയിരുന്നു.
മീമ്പാറയിൽ പ്ലാസ്റ്റിക് മാലിന്യത്തിന് തീപിടിച്ചു
11:59 PM Mar 24, 2023 | Deepika.com