ചങ്ങനാശേരി: സെന്റ് മേരീസ് മെത്രാപ്പോലീത്തന്പള്ളിയിലെ മര്ത്ത്മറിയം കബറിട പള്ളിയില് മാര് ജോസഫ് പവ്വത്തിലിന്റെ കബറിടം ഒരുങ്ങുന്നു.
ചങ്ങനാശേരി അതിരൂപതയുടെ പ്രഥമ ആര്ച്ച് ബിഷപ് ദൈവദാസന് മാര് മാത്യു കാവുകാട്ടിന്റെ കബറിടത്തോടു ചേർന്നാണ് കബറിടം തയാറാക്കുന്നത്.
ധന്യന് മാര് തോമസ് കുര്യാളശേരി, മാര് ജയിംസ് കാളാശേരി, മാര് പൗലോസ് അക്വിനാസ് എന്നീ മുന് മെത്രാന്മാരുടെ കബറിടങ്ങളും മര്ത്ത്മറിയം പള്ളിയിലാണ് സ്ഥിതി ചെയ്യുന്നത്.
മാര് പവ്വത്തിലിന്റെ സംസ്കാര ശുശ്രൂഷകള്ക്കായി വിപുലമായ ക്രമീകരണങ്ങളാണ് മെത്രാപ്പോലീത്തന് പള്ളിയില് ഒരുങ്ങുന്നത്. സംസ്കാരശുശ്രൂഷകള്ക്കായി എത്തുന്ന വിശ്വാസിസമൂഹത്തിന് ശുശ്രൂഷകളില് പങ്കെടുക്കുന്നതിനായി പള്ളിയങ്കണത്തില് വിസ്തൃതമായ പന്തലും എല്ഇഡി വീഡിയോ വോള് ക്രമീകരണങ്ങളും സജ്ജമാകുന്നുണ്ട്.
മെത്രാപ്പോലീത്തന് പള്ളിയില് ഇന്നലെ വൈകുന്നേരം നടന്ന പാരിഷ്കൗണ്സില്, വിവിധ സംഘടനാ ഭാരവാഹികള് തുടങ്ങിയവരുടെ യോഗത്തില് ആര്ച്ച്ബിഷപ് മാര് ജോസഫ് പെരുന്തോട്ടം അധ്യക്ഷത വഹിച്ചു. വികാരി റവ.ഡോ.ജോസ് കൊച്ചുപറമ്പില് നേതൃത്വം നല്കി. മെത്രാപ്പോലീത്തന് പള്ളിയില് ഇന്നു രാവിലെ ഏഴിന് വിശുദ്ധകുര്ബാനയും പ്രാര്ഥനാശുശ്രൂഷകളും നടക്കും.
മര്ത്ത്മറിയം കബറിട പള്ളിയില് കബറിടം ഒരുങ്ങുന്നു
10:38 PM Mar 19, 2023 | Deepika.com