പിറവം: പിറവത്ത് റീബില്ഡ് കേരള പദ്ധതിയില് ഉള്പ്പെടുത്തി നിര്മാണ പ്രവൃത്തികള് നടന്നുകൊണ്ടിരിക്കുന്ന പെരുവ-പിറവം-പെരുവാംമൂഴി റോഡിന്റെ ഡിപിആറിൽ അനിവാര്യമായ മാറ്റങ്ങള് വരുത്താന് നിര്ദേശം നല്കിയതായി അനൂപ് ജേക്കബ് എംഎല്എയുടെ സബ്മിഷനു മറുപടിയായി മന്ത്രി മുഹമ്മദ് റിയാസ് നിയമസഭയില് അറിയിച്ചു. ഡിപിആറിൽ വന്ന അപാകത കാരണം റോഡ് നിര്മാണം പൂര്ത്തിയാകുമ്പോള് പല ഭാഗത്തും വെള്ളക്കെട്ട് രൂപപ്പെടുന്ന സാഹചര്യമുണ്ടാകും.
മാറ്റം വരുത്തിയ ഡിപിആർ അനുസരിച്ച് പ്രവൃത്തി ഉടന് പൂര്ത്തിയാക്കാനുള്ള നിര്ദേശം നല്കിയതായി മന്ത്രി സഭയില് അറിയിച്ചു. കൂടാതെ റീബില്ഡ് കേരള പുനരുദ്ധാരണ പദ്ധതിയില് ഉള്പ്പെടുത്തിയ ആരക്കുന്നം-ആമ്പല്ലൂര്, പൂത്തോട്ട-പിറവം റോഡിന്റെ നിര്മാണ പ്രവൃത്തികളും ഉടന് പൂര്ത്തിയാക്കും.
ഇതിന്റെ പ്രാരംഭ ഘട്ടമായി വൈദ്യുതി ലൈനുകള് മാറ്റുന്നതും പൈപ്പ് ലൈനുകള് മാറ്റി സ്ഥാപിക്കുന്നതും മരങ്ങള് മുറിച്ചു മാറ്റുന്നതും കള്വര്ട്ടറുകള് സ്ഥാപിക്കുന്നതുമുള്പ്പെടെയുള്ള പ്രവൃത്തികള് നടന്നുവരികയാണെന്നും മന്ത്രി സബ്മിഷനു മറുപടിയായി നൽകി.
പിറവം-പെരുവംമുഴി റോഡിന്റെ ഡിപിആറിൽ മാറ്റം വരുത്തും
12:38 AM Feb 09, 2023 | Deepika.com