നെടുമങ്ങാട് : ഐഎൻടിയുസി ജില്ലാ സമ്മേളനത്തോടനുബന്ധിച്ചുള്ള കൊടിമര, പതാക, ഛായാചിത്ര, ദീപശിഖാ ജാഥകൾ നാളെ ജില്ലയുടെ വിവിധ കേന്ദ്രങ്ങളിൽ നിന്ന് തുടങ്ങും. ദീപശിഖാ ജാഥ നാളെ രാവിലെ പാറശാല കാമരാജ് പ്രതിമയിൽ നിന്ന് ട്രേഡ് യൂണിയൻ നേതാവും സ്പോർട്സ് താരവുമായ പത്മിനി തോമസിന്റെ നേതൃത്വത്തിൽ ആരംഭിക്കും. കെപിസിസി ജനറൽ സെക്രട്ടറി മര്യാപുരം ശ്രീകുമാർ ഉദ്ഘാടനം ചെയ്യും. മുൻ എംഎൽഎ എ.ടി. ജോർജ് അധ്യക്ഷത വഹിക്കും.
ദീപശിഖ ജാഥ പാറശാല, നെയ്യാറ്റിൻകര, ബാലരാമപുരം, കാട്ടാക്കട, പൂവച്ചൽ, വെള്ളനാട് തുടങ്ങിയ പ്രദേശങ്ങളിലെ സ്വീകരണങ്ങൾ ഏറ്റുവാങ്ങി വൈകുന്നേരം നാലിന് നെടുമങ്ങാട് സമാപിക്കും. രാവിലെ ഒന്പതിന് മടത്തറയിൽ നിന്നും ആരംഭിക്കുന്ന കൊടിമര ജാഥയ്ക്ക് ഐഎൻടിയുസി അഖിലേന്ത്യ സെക്രട്ടറി കെ.പി. തമ്പി കണ്ണാടൻ നേതൃത്വത്തിൽ വൈകുന്നേരം അഞ്ചിന് നെടുമങ്ങാട്ട് എത്തിച്ചേരും. കെപിസിസി ജനറൽ സെക്രട്ടറി എം.എം. നസീർ ഉദ്ഘാടനം ചെയ്യും.
നാളെ രാവിലെ വർക്കല മൈതാനത്തു നിന്ന് ആരംഭിക്കുന്ന പതാക ജാഥ പി.എം. ബഷീർ ഉദ്ഘാടനം ചെയ്യും. കനകക്കുന്നിൽ കെ. കരുണാകരന്റെ പ്രതിമയ്ക്ക് മുന്പിൽ നിന്ന് ആരംഭിക്കുന്ന ഛായാ ചിത്ര ജാഥ മുൻ എംഎൽഎ ശരത്ചന്ദ്ര പ്രസാദ് ഉദ്ഘാടനം ചെയ്യും. ആർ.എം. പരമേശ്വരൻ ജാഥയ്ക്ക് നേതൃത്വം നൽകും.
നാളെ വൈകുന്നേരം അഞ്ചിന് നെടുമങ്ങാട് ചന്ത ജംഗ്ഷനിൽ എത്തിച്ചേരുന്ന പതാക, കൊടിമര, ദീപശിഖ, ഛായാചിത്ര ജാഥകൾ ഐഎൻടിയുസി മുൻ ജില്ലാ പ്രസിഡന്റ് അഡ്വ. വിതുര ശശി സ്വീകരിക്കും. 5.30ന് ഡിസിസി പ്രസിഡന്റ് പാലോട് രവി ജില്ലാ സമ്മേളന പതാക ഉയർത്തും. ഐഎൻടിയുസി ജില്ലാ പ്രസിഡന്റ് വി.ആർ. പ്രതാപൻ ചടങ്ങിൽ അധ്യക്ഷത വഹിക്കും.
11ന് ഉച്ചകഴിഞ്ഞ് മൂന്നിന് നെടുമങ്ങാട് പഴകുറ്റി ജംഗ്ഷനിൽ നിന്ന് പ്രകടനം ആരംഭിക്കും. ചന്ത ജംഗ്ഷനിൽ നടക്കുന്ന പൊതു സമ്മേളനം മുൻപ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്യും. 12 ന് മുനിസിപ്പൽ ടൗൺഹാളിൽ നടക്കുന്ന പ്രതിനിധി സമ്മേളനം ഐഎൻടിയുസി സംസ്ഥാന പ്രസിഡന്റ് ആർ. ചന്ദ്രശേഖരൻ ഉദ്ഘാടനം ചെയ്യും. കൊടിക്കുന്നിൽ സുരേഷ് എംപി പ്രതിനിധി സമ്മേളനത്തിന്റെ സമാപന സമ്മേളനം ഉദ്ഘാടനം ചെയ്യും.
ഐഎൻടിയുസി ജില്ലാ സമ്മേളനം നാളെ മുതൽ നെടുമങ്ങാട്ട്
11:57 PM Feb 08, 2023 | Deepika.com