കല്ലോടി: സെന്റ് ജോസഫ്സ് ഹൈ സ്കൂളിന്റെ 47 -ാം വാർഷികാഘോഷവും പ്രതിഭകൾക്കുള്ള അനുമോദനവും സ്കൂൾ ഓഡിറ്റോറിയത്തിൽ നടത്തി. ജില്ലാ പഞ്ചായത്ത് ക്ഷേമകാര്യ ചെയർമാൻ ജുനൈദ് കൈപ്പാണി ഉദ്ഘാടനം ചെയ്തു.
സ്കൂൾ മാനേജർ ഫാ. ബിജു മാവറ അധ്യക്ഷത വഹിച്ചു. എടവക പഞ്ചായത്ത് വൈസ് പ്രസിഡന്റ് ജംഷീറ ഷിഹാബ് വിരമിച്ചവർക്കുള്ള ഉപഹാരം സമർപ്പിച്ചു. സ്കൂളിനെ പ്രതിനിധാനം ചെയ്തു സംസ്ഥാന, ദേശീയ തലങ്ങളിൽ വിജയികളായ വിദ്യാർഥികൾക്ക് പുരസ്കാരങ്ങൾ നൽകി. ഔദ്യോഗിക ജീവിതത്തിൽ നിന്നും വിരമിക്കുന്ന മുൻ പ്രധാന അധ്യാപിക അന്നമ്മ എം. ആന്റണി, കെ.വി. സാലി എന്നിവരെ ആദരിച്ചു. ലിറ്റിൽ കൈറ്റ്സിന്റെ നേതൃത്വത്തിൽ നിർമിച്ച ഡിജിറ്റൽ മാഗസിൻ എംപിടിഎ പ്രസിഡന്റ് രമ്യ ബാബു പ്രകാശനം ചെയ്തു. പിടിഎ പ്രസിഡന്റ് ബിനു എം. രാജൻ വിജയികൾക്കുള്ള സമ്മാനദാനം നിർവഹിച്ചു. പ്രിൻസിപ്പൽ ബ്രിജേഷ് ബാബു, പ്രധാനാധ്യാപിക കെ.ജെ. ജാക്വിലിൻ, സ്റ്റാഫ് സെക്രട്ടറി നജീബ് മണ്ണാർ, സ്കൂൾ ലീഡർ മുഹമ്മദ് റിഷാൻ എന്നിവർ പ്രസംഗിച്ചു. പ്രതിഭകളെ അനുമോദിക്കുന്നതിന്റെ ഭാഗമായി കല്ലോടിയിൽ പ്രത്യേക റാലിയും കലാപരിപാടികളും സംഘടിപ്പിച്ചു.
കല്ലോടി സെന്റ് ജോസഫ്സ് ഹൈസ്കൂൾ വാർഷികം
12:01 AM Feb 04, 2023 | Deepika.com