കാസര്ഗോഡ്: 2023 -24 സാമ്പത്തിക വര്ഷം ജില്ലയിലെ പട്ടികവര്ഗ മേഖലയില് നടപ്പാക്കേണ്ട ജില്ലാ പഞ്ചായത്തിന്റെ പദ്ധതികളിലേക്കുള്ള മാര്ഗനിര്ദേശങ്ങള് ചര്ച്ച ചെയ്യാന് ഗോത്രസഭ സംഘടിപ്പിച്ചു. ജില്ലാ പഞ്ചായത്ത് ആസൂത്രണ സമിതി ഹാളില് ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണന് ഗോത്രസഭ ഉദ്ഘാടനം ചെയ്തു. ബ്ലോക്ക് തലത്തില് ഗ്രൂപ്പ് തിരിഞ്ഞ് ചര്ച്ച നടത്തിയ ശേഷം വിവിധ മാര്ഗ നിര്ദേശങ്ങള് അംഗങ്ങള് അവതരിപ്പിച്ചു. ഗോത്രവാഹിനി പദ്ധതി ത്രിതല പഞ്ചായത്തുകളുടെ സംയുക്ത പദ്ധതിയാക്കണമെന്ന് നിര്ദ്ദേശമുയര്ന്നു. ഗോത്രവാഹിനി പദ്ധതിയിലെ മാര്ഗനിര്ദേശങ്ങള് കാലാനുസൃതമായി പരിഷ്കരിക്കണം. അര്ഹതപ്പെട്ടവരിലേക്ക് മാത്രം പദ്ധതി പരിമിതപ്പെടുത്തണമെന്നും നിര്ദ്ദേശിച്ചു. പട്ടികവര്ഗ വിഭാഗങ്ങള്ക്കായി നിര്മിക്കുന്ന കമ്യൂണിറ്റി ഹാളില് സോളാര് സംവിധാനം ഏര്പ്പെടുത്തണം. കന്നഡ മേഖലയില് ഉള്പ്പെടെ പിഎസ്സി കോച്ചിംഗ് നടത്തണം. ലൈബ്രറികള് സ്ഥാപിക്കണം. ലൈഫ് മിഷന് വിഹിതം വര്ധിപ്പിക്കണം. പഠനമുറികള് നടപ്പാക്കണം. ഡ്രൈവിംഗ് പരിശീലനം നല്കി ഓട്ടോറിക്ഷ അനുവദിക്കണം. ഓഡിറ്റോറിയത്തിന്റെ സൗകര്യത്തോടെയുള്ള സാംസ്കാരിക നിലയം സ്ഥാപിക്കണം. ജില്ലാ കളക്ടര് ഉള്പ്പെടെയുള്ളവരെ പങ്കെടുപ്പിച്ച് തദ്ദേശസ്ഥാപനങ്ങളില് ഊര് അദാലത്ത് നടത്തണം. മുടങ്ങിക്കിടക്കുന്ന കുടിവെള്ള പദ്ധതികള് നവീകരിക്കണം. കോളനികളിലേക്ക് നടപ്പാത നിര്മിക്കണം. റോഡുകള് നവീകരിക്കണമെന്നും നിര്ദേശമുയര്ന്നു. ഗോത്രസഭയില് ഉന്നയിച്ച ആവശ്യങ്ങള് ഫെബ്രുവരി ഒമ്പതിന് നടക്കുന്ന ജില്ലാ പഞ്ചായത്ത് വികസന സെമിനാറില് ചര്ച്ച ചെയ്ത് അന്തിമ രൂപം നല്കും.
ജില്ലാ പഞ്ചായത്തംഗം നാരായണ നായിക് അധ്യക്ഷത വഹിച്ചു. വൈസ് പ്രസിഡന്റ് ഷാനവാസ് പാദൂര്, ജില്ലാ പഞ്ചായത്തംഗം ഫാത്തിമത്ത് ഷംന, പഞ്ചായത്ത് പ്രസിഡന്റുമാരായ ഗിരിജ മോഹനന് (വെസ്റ്റ് എളേരി), മുരളി പയ്യങ്ങാനം (കുറ്റിക്കോല്), ടി.കെ.നാരായണന് (കള്ളാര്) എന്നിവര് പ്രസംഗിച്ചു. ജില്ലാ പട്ടിക വര്ഗ വികസന ഓഫീസര് എം. മല്ലിക സ്വാഗതവും എടിഡിഒ കെ. മധുസൂദനന് നന്ദിയും പറഞ്ഞു.
ഗോത്രവാഹിനി ത്രിതല പഞ്ചായത്ത് സംയുക്ത പദ്ധതിയാക്കണമെന്ന് ഗോത്രസഭ
12:48 AM Feb 01, 2023 | Deepika.com