തൊടുപുഴ: കേരള പത്രപ്രവർത്തക യൂണിയൻ (കെയുഡബ്ല്യുജെ) സംസ്ഥാന കമ്മിറ്റിയുടെ നേതൃത്വത്തിൽ 20, 21 തീയതികളിൽ കെസിഎ തെക്കുംഭാഗം അന്താരാഷ്ട്ര ക്രിക്കറ്റ് സ്റ്റേഡിയത്തിൽ സംഘടിപ്പിക്കുന്ന ജേർണലിസ്റ്റ് ക്രിക്കറ്റ് ലീഗിന്റെ സ്വാഗതസംഘം ഓഫീസ് തൊടുപുഴ ഡിവൈഎസ്പി എം.ആർ. മധുബാബു ഉദ്ഘാടനം ചെയ്തു.
പ്രസ് ക്ലബ് പ്രസിഡന്റ് സോജൻ സ്വരാജ് അധ്യക്ഷത വഹിച്ചു. സെക്രട്ടറി ജെയ്സ് വാട്ടപ്പിള്ളിൽ സ്വാഗതവും കമ്മിറ്റിയംഗം പി.കെ.എ. ലത്തീഫ് നന്ദിയും പറഞ്ഞു. ട്രഷറർ കെ.ബി. വിൽസണ്, വൈസ് പ്രസിഡന്റുമാരായ അഫ്സൽ ഇബ്രാഹിം, എം. ബിലീന, കമ്മിറ്റിയംഗങ്ങളായ ഹാരിസ് മുഹമ്മദ്, ഒ.ആർ. അനൂപ്, വിനോദ് കണ്ണോളി, എം.എൻ. സുരേഷ് എന്നിവർ പ്രസംഗിച്ചു. പ്രസ് ക്ലബിന്റെ രണ്ടാം നിലയിലാണ് സ്വാഗതസംഘം ഓഫീസ് സജ്ജമാക്കിയിരിക്കുന്നത്.
മന്ത്രി റോഷി അഗസ്റ്റിൻ രക്ഷാധികാരിയും ജനപ്രതിനിധികൾ ഉപരക്ഷാധികാരികളുമായി വിപുലമായ സ്വാഗതസംഘവും വിവിധ സബ്കമ്മിറ്റികളും പ്രവർത്തനം ആരംഭിച്ചു.14 ജില്ലാ പ്രസ് ക്ലബുകളുടെ നേതൃത്വത്തിലുള്ള ടീമുകളാണ് മത്സരത്തിൽ മാറ്റുരയ്ക്കുന്നത്. വിജയികൾക്ക് ഒരു ലക്ഷം രൂപയും അൽഅസ്ഹർ കപ്പുമാണ് സമ്മാനം. റണ്ണേഴ്സ് അപ്പിന് 50,000 രൂപയും ട്രോഫിയും നൽകും.
ജേർണലിസ്റ്റ് ക്രിക്കറ്റ് ലീഗ് സ്വാഗതസംഘം ഓഫീസ് ഉദ്ഘാടനം ചെയ്തു
10:27 PM Dec 06, 2022 | Deepika.com