പറവൂര്: മൂത്തകുന്നത്ത് അഞ്ചുനാൾ നീണ്ട കൗമാര കലാമാമാങ്കത്തിനൊടുവില് കിരീടം എറണാകുളത്തേക്ക് വണ്ടികയറി. ആതിഥേയരായ നോര്ത്ത് പറവൂര് ഉപജില്ലയെ 52 പോയിന്റു വിത്യാസത്തിൽ പിന്നിലാക്കി 804 പോയിന്റോടെയാണ് എറണാകുളത്തിന്റെ കിരീടധാരണം. അവസാനദിനം വരെ കടുത്ത മത്സരം കാഴ്ചവച്ച നോര്ത്ത് പറവൂര് 752 പോയിന്റോടെ രണ്ടാം സ്ഥാനത്തും ആലുവ (723), മട്ടാഞ്ചേരി (679),പെരുമ്പാവൂര് (640) എന്നീ ഉപജില്ലകള് യഥാക്രമം മൂന്നു മുതല് അഞ്ചുവരെ സ്ഥാനങ്ങളിലും ഫിനിഷ് ചെയ്തു. സ്കൂളുകളില് സെന്റ് തെരേസാസ് സിജിഎച്ച്എസ്എസാണ് ഒന്നാമതെത്തിയത്.
ഹയര്സെക്കൻഡറി ജനറല് വിഭാഗത്തില് എറണാകുളം 351 പോയിന്റോടെ തലപ്പത്തു സ്ഥാനം പിടിച്ചപ്പോൾ ആലുവ (339) രണ്ടാമതും നോര്ത്ത് പറവൂര് (310) മൂന്നാമതും എത്തി. ഹൈസ്കൂള് ജനറല് വിഭാഗത്തിലും എറണാകുളമാണ് മുന്നിൽ( 311). രണ്ടാം സ്ഥാനത്ത് നോര്ത്ത് പറവൂരും (299) മൂന്നാമത് മട്ടാഞ്ചേരിയും (274). യുപി ജനറല് വിഭാഗത്തില് നോര്ത്ത് പറവൂരൂം എറണാകുളവും പെരുമ്പാവൂരും തമ്മില് ഇഞ്ചോടിഞ്ചു പോരാട്ടമാണ് നടന്നത്. മൂന്നു ടീമിനും യഥാക്രമം 143,142,141 എന്നിങ്ങനെയാണ് പോയിന്റ്.
ഹൈസ്കൂള് സംസ്കൃതോത്സവത്തില് 93 പോയിന്റോടെ ആലുവ മുന്നിലെത്തി.90 പോയിന്റു വീതമുള്ള നോര്ത്ത് പറവൂരും പെരുമ്പാവൂരും തൊട്ടുപിന്നിലുണ്ട്. യുപി സംസ്കൃതോത്സവത്തില് മട്ടാഞ്ചേരിയും നോര്ത്തു പറവൂരും ആലുവയും 86 പോയിന്റ് വീതം നേടി മുന്നിലെത്തി. എച്ച്എസ് അറബിക്കില് ആലുവയും(87) വൈപ്പിനും(85) തമ്മില് ഇഞ്ചോടിഞ്ച് പോരാട്ടമായിരുന്നു. യുപി അറബിക്കില് കോലഞ്ചേരിയും (63) ആലുവയും (61) മാണ് ഒന്നും രണ്ടും സ്ഥാനങ്ങളിലെത്തിയത്.
വൈപ്പിന് ( 616), മൂവാറ്റുപുഴ (610),കോലഞ്ചേരി (565), അങ്കമാലി (535), തൃപ്പുണിത്തുറ (486),കോതമംഗലം ( 478),പിറവം (319), കൂത്താട്ടുകുളം (296), കല്ലൂര്ക്കാട് (207) എന്നിങ്ങനെയാണ് ആറു മുതല് 14 വരെ സ്ഥാനങ്ങളിലെ ഉപജില്ലകളുടെ ഓവറോൾ പോയിന്റ് നില.
സമാപന സമ്മേളനം ബെന്നി ബഹനാന് എംപി ഉദ്ഘാടനം ചെയ്തു. കെ.എൻ. ഉണ്ണികൃഷ്ണന് എംഎല്എ സമ്മാനദാനം നിര്വഹിച്ചു. പറവൂര് ബ്ലോക്ക് പഞ്ചായത്ത് പ്രസിഡന്റ് സിംന സന്തോഷ് അധ്യക്ഷത വഹിച്ചു. വിദ്യാഭ്യാസ ഡെപ്യൂട്ടി ഡയറക്ടര് ഹണി ജി. അലക്സാണ്ടര് പങ്കെടുത്തു.
കലാകിരീടം എറണാകുളത്തിന്
12:54 AM Dec 03, 2022 | Deepika.com