ഇരിട്ടി: ഇരിട്ടി ബ്ലോക്ക് കേരളോത്സവത്തിന്റെ വിവിധ മത്സരങ്ങൾ ബ്ലോക്ക് പരിധിയിലെ വിവിധ പഞ്ചായത്തുകളിൽ ആരംഭിച്ചു. ഇന്നു രാവിലെ 10 മുതൽ ഇരിട്ടി ബ്ലോക്ക് പഞ്ചായത്ത് ഹാളിൽ ചെസ് മത്സരങ്ങളും തുടർന്ന് 11 മുതൽ പഞ്ചഗുസ്തി മത്സരവും നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു.
ഫുട്ബോൾ മത്സരങ്ങൾ ബുധനാഴ്ച കൂടാളി ഹയർ സെക്കൻഡറി സ്കൂൾ ഗ്രൗണ്ടിലും വടംവലി മത്സരം കോണ്ടന്പ്ര ഗ്രൗണ്ടിലും നടക്കും. ഡിസംബർ ഒന്നിന് രാവിലെ ക്രിക്കറ്റ് മത്സരങ്ങൾ അങ്ങാടിക്കടവ് ഡോൺബോസ്കോ കോളജ് ഗ്രൗണ്ടിലും, ഡിസംബർ മൂന്നിന് അത്ലറ്റിക്ക് മത്സരങ്ങൾ കിളിയന്തറ സെന്റ് തോമസ് ഹയർ സെക്കൻഡറി സ്കൂൾ ഗ്രൗണ്ടിലും നടക്കും.
സമാപന ദിവസമായ ഡിസംബർ നാലിന് പട്ടാന്നൂർ കെപിസിഎച്ച്എസ്എസിൽ നടക്കുന്ന കലാമത്സരങ്ങൾ ബ്ലോക്ക് പഞ്ചായത്ത് പ്രസിഡന്റ് കെ. വേലായുധന്റെ അധ്യക്ഷതയിൽ മട്ടന്നൂർ എം എൽ എ കെ. കെ. ശൈലജ ഉദ്ഘാടനം ചെയ്യും.
വൈകുന്നേരം സമാപന സമ്മേളനത്തിൽ സണ്ണിജോസഫ് എംഎൽഎ സമ്മാനദാനം നിർവഹിക്കും.പത്രസമ്മേളനത്തിൽ ബ്ലോക്ക് പഞ്ചായത്ത് പ്രസിഡന്റ് കെ. വേലായുധൻ, സി. ഷിജു, ഏബ്രഹാം തോമസ്, ഇ.വി. ബിജു എന്നിവർ പങ്കെടുത്തു.
ഇരിട്ടി ബ്ലോക്ക് പഞ്ചായത്ത് കേരളോത്സവം തുടങ്ങി
12:39 AM Nov 29, 2022 | Deepika.com