വൈദ്യുതിലൈൻ പൊട്ടി വീണ് വളർത്തുമൃഗങ്ങൾ ചത്തു
12:18 AM Oct 03, 2022 | Deepika.com
പിറവം: പാമ്പാക്കുടയിൽ പാടത്ത് വൈദ്യുതി ലൈൻ പൊട്ടിവീണ് രണ്ട് പശുവും ഒരു മൂരിയും ചത്തു. മേമുറി നെടുനിലം പടവിലെ പാടശേഖത്തിലൂടെ കടന്നുപോകുന്ന ഇലക്ട്രിക് ലൈനാണ് പൊട്ടിവീണത്. ഇരട്ടക്കുളങ്ങര വീട്ടിൽ ബിജുവിന്റേതാണ് രണ്ടു കറവപശുക്കളും മൂരിയും. വൈകുന്നേരം പശുക്കളെ തിരികെ കൊണ്ടു പോകുന്നതിനായി പാടത്തേക്ക് ഇറങ്ങിയപ്പോൾ ബിജുവിന് ചെറിയ രീതിയിൽ വൈദ്യുതാഘാതം അനുഭവപ്പെട്ടിരുന്നു. പിന്നീടാണ് വളർത്തുമൃഗങ്ങൾ ചത്തുകിടക്കുന്നതു കണ്ടത്. മൃഗങ്ങൾ ചത്തുകിടക്കുന്നതിൽ നിന്നും 150 മീറ്ററോളം അകലെയാണ് ലൈൻ പൊട്ടിവീണത്. പോസ്റ്റ്മോർട്ടം നടത്തിയ ശേഷം പാടത്തിന് സമീപം മൃഗങ്ങളെ കുഴിച്ചിട്ടു.