അബുദാബി: മലയാളം മിഷൻ അബുദാബി മേഖലയുടെ ആഭിമുഖ്യത്തിൽ ഓഗസ്റ്റ് 1 മുതൽ 31 വരെ ഓണ്ലൈൻ സർഗോത്സവം സംഘടിപ്പിക്കുന്നു. വളരെ വിപുലമായി നടത്താനുദ്ദേശിച്ച സർഗോത്സവം കോവിഡ് വ്യാപന പ്രതിരോധങ്ങളുടെ ഭാഗമായാണ് ഓണ്ലൈനായി സംഘടിപ്പിക്കുന്നത്.
കുരുന്നു പ്രതിഭകളുടെ പ്രയാണപഥങ്ങളിലൂടെയുള്ള ഒരു സഞ്ചാരം എന്ന ശീർഷകത്തിൽ ഒരുക്കുന്ന സർഗോത്സവം അബുദാബിയിലെ വിദ്യാർഥികളുടെ വേനലവധിക്കാലങ്ങൾ സർഗാത്മകമാക്കാനൊരവസരം കൂടിയാണ്.
മലയാളം മിഷൻ അബുദാബി മേഖലയുടെ കീഴിൽ അബുദാബി, ബദാസായിദ്, മുസഫ, മദീന സായിദ്, ഖാലിദിയ, ഇലക്ട്ര, ഹംദാൻ തുടങ്ങിയ സ്ഥലങ്ങളിൽ 32 കേന്ദ്രങ്ങളിലായി 46 അധ്യാപകരുടെ കീഴിൽ ആയിരത്തി ഇരുനൂറിലേറെ വിദ്യാർഥികളാണ് മലയാള ഭാഷ സൗജന്യമായി പഠിച്ചുവരുന്നത്. മലയാളം മിഷൻ വിദ്യാർഥികൾ അവരവരുടെ ക്ലാസ് ഗ്രൂപ്പുകളിലൂടെ പോസ്റ്റ് ചെയ്യുന്ന സർഗസൃഷ്ടികൾ മലയാളം മിഷന്റെ എഫ്ബി പേജിലൂടെയും ഗ്രൂപ്പിലൂടെയും യൂട്യൂബ് ചാനലിലൂടെയും പൊതുസമൂഹത്തിലെത്തിക്കുന്നു.
ഏകപാത്രനാടകം, മോണോക്ട്, നൃത്തം, ഗാനാലാപനം, കവിതാലാപനം, കഥ അവതരണം, പ്രസംഗം, ചിത്രചന, വാദ്യസംഗീതം, കഥാപ്രസംഗം, പാചകകല തുടങ്ങിയ വിവിധ കലാരൂപങ്ങളുടെ വീഡിയോ ദൃശ്യങ്ങൾ ഗ്രൂപ്പിൽ പോസ്റ്റ് ചെയ്യാവുന്നതാണ്. പോസ്റ്റ് ചെയ്യുന്ന കുട്ടികൾ അബുദാബി മേഖലയ്ക്ക് കീഴിൽ പഠിക്കുന്ന മലയാളം മിഷൻ വിദ്യാർഥികളായിരിക്കണം.
പോസ്റ്റ് ചെയ്യുന്ന സൃഷ്ടിയോടൊപ്പം പേരും ക്ലാസും (സൂര്യകാന്തി, സീനിയർ കണിക്കൊന്ന, ജൂനിയർ കണിക്കൊന്ന) രേഖപ്പെടുത്തണം.
മലയാളം മിഷന്റെ പുതിയ ബാച്ചുകൾ ആരംഭിക്കുന്നതിന്റെ ഭാഗമായുള്ള പ്രവേശനോത്സവം ഓഗസ്റ്റ് മാസത്തിൽ ഓണ്ലൈനിൽ സംഘടിപ്പിക്കുമെന്ന് സംഘാടകർ അറിയിച്ചു.
കൂടുതൽ വിവരങ്ങൾക്ക് 050 7890398 / 050 6112652
റിപ്പോർട്ട്: അനിൽ സി. ഇടിക്കുള
മലയാളം മിഷൻ സർേഗോത്സവം ഓഗസ്റ്റ് ഒന്ന് മുതൽ
10:32 PM Jul 30, 2020 | Deepika.com