ടെക്സസിലെ പ്രകൃതിസുന്ദരമായ ഗിഡിംഗ്സിലുള്ള ക്യാന്പ് തേജസിൽ വച്ചായിരുന്നു ഫാമിലി റീ യൂണിയൻ 2019. പങ്കെടുത്ത 76 കുടുംബാംഗങ്ങളും ഒരേ യൂണിഫോമിൽ അണിനിരന്നപ്പോൾ കുടുംബ സംഗമം അവിസ്മരണീയമായി മാറി. ഇന്ത്യയിലെ ഡെറാഡൂണിൽ നിന്നും കേരളത്തിൽ നിന്നും എത്തി ചേർന്ന കുടുംബാംഗങ്ങളോടൊപ്പം അമേരിക്കയിലെ ഹൂസ്റ്റണ്, ഡാളസ്, ഓസ്റ്റിൻ തുടങ്ങി വിവിധ നഗരങ്ങളിൽ നിന്നും അംഗങ്ങൾ പങ്കെടുത്തു.
വെള്ളിയാഴ്ച നടന്ന ഉദ്ഘാടന സമ്മേളനത്തിൽ പ്രസിഡന്റ്് ട്രംപിനെയും ഇന്ത്യൻ പ്രധാനമന്ത്രിയെയും അവരുടെ വേഷവിധാനങ്ങളോടെ അംഗങ്ങൾ ഹാസ്യാത്മകമായി
അവതരിപ്പിച്ചത് ശ്രദ്ധ പിടിച്ചു പറ്റി. ഡിവോഷണൽ ഡാൻസ്, ഷാഡോ ഡാൻസ്, ബൂം ബൂം ബിരിയാണി ഡാൻസ്, വിവിധ ഭാഷകളിൽ അടിപൊളി ഗാനങ്ങൾ തുടങ്ങിയ പരിപാടികൾ ടാലണ്ട് നൈറ്റിന് കൊഴുപ്പു കൂട്ടി. ’ആധുനിക ക്രിസ്ത്യാനികൾ’ എന്ന വിഷയത്തോട് ബന്ധപ്പെടുത്തി അവതരിപ്പിച്ച സ്കിറ്റ് അർത്ഥവത്തും മികവുറ്റതുമായിരുന്നു.
കൂടത്തിനാലിൽ സഹോദരങ്ങളായ ജോണ് തോമസ്, കെ. ജോണ് വർഗീസ്, ജോണ് എബ്രഹാം, ജോണ് ജോസഫ് തുടങ്ങിയവർ കുടുംബ സംഗമത്തിന് നേതൃത്വം നൽകി. 2007 മുതൽ ഒന്നിടവിട്ട വർഷങ്ങളിൽ അമേരിക്കയിൽ വച്ച് നടത്തപ്പെടുന്ന കുടുംബസംഗമത്തിന്റെ അടുത്ത കൂടി വരവ് നടക്കുന്ന 2021 ൽ വീണ്ടും കാണാമെന്ന പ്രതീക്ഷയോടെ ഞായറാഴ്ച കുടുംബസംഗമം സമാപിച്ചു.
റിപ്പോർട്ട്: ജീമോൻ റാന്നി