ന്യൂജേഴ്സി: ഫോമാ മിഡ് അറ്റ്ലാന്റിക് റീജണിന്റെ 2020-22 കാലഘട്ടത്തിലേക്കുള്ള റീജണൽ വൈസ് പ്രസിഡന്റ് സ്ഥാനത്തേക്ക് ബൈജു വർഗീസ് നോമിനേറ്റ് ചെയ്യപ്പെട്ടു. നോർത്ത് അമേരിക്കയിലെ ഏറ്റവും വലിയ അസോസിയേഷനുകളിലൊന്നായ കേരളാ അസോസിയേഷൻ ഓഫ് ന്യൂജേഴ്സിയെ പ്രതിനിധീകരിച്ചാണ് ബൈജു വർഗീസ് ഈ സ്ഥാനത്തേക്ക് എത്തുന്നത്.
കേരളാ അസോസിയേഷൻ ഓഫ് ന്യൂജേഴ്സിയുടെ ഏപ്രിൽ മാസത്തിൽ നടന്ന കമ്മറ്റിയിൽ പ്രസിഡന്റ് ജയൻ ജോസഫ് ആണ് അദ്ദേഹത്തിന്റെ പേര് ഈ സ്ഥാനത്തേക്ക് നിർദേശിച്ചത്. കമ്മറ്റി ഐക്യകണ്ഠനെ അംഗീകരിക്കുകയായിരുന്നു. കേരളാ അസോസിയേഷൻ ഓഫ് ന്യൂജേഴ്സിയുടെ മികച്ച പ്രവർത്തകരിലൊരാളായ ബൈജുവിന്റെ നേതൃത്വം ഫോമാ മിഡ് അറ്റ്ലാന്റിക് റീജിയന് ഒരു വലിയ മുതൽക്കൂട്ടാവുമെന്ന് കമ്മറ്റി അഭിപ്രായപ്പെട്ടു.
കഴിഞ്ഞ കുറെ വർഷങ്ങളായി ഫോമാ മിഡ് അറ്റ്ലാന്റിക് റീജണിന്റെയും കേരളാ അസോസിയേഷൻ ഓഫ് ന്യൂജേഴ്സിയുടെയും എല്ലാ പ്രവർത്തനങ്ങളിലും ഒരു നിറസാന്നിധ്യമാണ് ബൈജു വർഗീസ്, കേരളാ അസോസിയേഷൻ ഓഫ് ന്യൂജേഴ്സിയുടെ ഇപ്പോഴത്തെ ജനറൽ സെക്രട്ടറി കൂടിയായ ബൈജു വർഗീസ് ഷിക്കാഗോയിൽ വച്ചു നടത്തപ്പെട്ട ഫോമാ കണ്വൻഷൻ രജിസ്ട്രേഷൻ കോർഡിനേറ്ററായി വളരെ പ്രശംസനീയമായ പ്രവർത്തനമാണ് കാഴ്ചവച്ചത്. അമേരിക്കയിലുടനീളം നല്ല സുഹൃത്ബന്ധ്ങ്ങൾ കാത്തു സൂക്ഷിക്കുന്ന ബൈജുവിന്റെ പ്രവർത്തനങ്ങൾ ഫോമായ്ക്ക് കരുത്തു പകരും എന്നതിൽ സംശയമില്ല. ഫോമാ മിഡ് അറ്റ്ലാന്റിക് റീജണിയിലെ എല്ലാ അസോസിയേഷൻ നേതാക്കളുടെയും അനുഗ്രഹത്തോടെയാണ് ബൈജു ഈ ഉത്തരവാദിത്തം ഏറ്റെടുക്കാൻ തയാറാവുന്നത്.
മാത്തമാറ്റിക്സിൽ ബിരുദവും കന്പ്യൂട്ടർ ആപ്ലിക്കേഷൻസിൽ മദ്രാസ് യൂണിവേഴ്സിറ്റിയിൽ നിന്ന് ബിരുദാനന്തര ബിരുദവും നേടിയ ശേഷമാണ് ബൈജു അമേരിക്കയിലെത്തിയത്. ടാറ്റ കണ്സൾട്ടൻസി സർവീസിൽ ബിസിനസ് റിലേഷൻഷിപ്പ് മാനേജരായി ജോലി ചെയ്യുന്നു.
റിപ്പോർട്ട്: ജോസഫ് ഇടിക്കുള
ഫോമാ മിഡ് അറ്റ്ലാന്റിക് റീജണൽ വൈസ് പ്രസിഡന്റ് സ്ഥാനത്തേക്ക് ബൈജു വർഗീസിനെ നോമിനേറ്റു ചെയ്തു
12:16 AM May 16, 2019 | Deepika.com